بسبب حقن التخسيس.. إدوارد يعلن تفاصيل إصابته بشلل في المعدة

أعلن الفنان إدوارد إصابته بـ"شلل في المعدة" نتيجة اعتماده لفترة على حقن التخسيس، موضحا أنها ليست سيئة لكن من الضروري المتابعة مع أكثر من تخصص طبي، وعدم الاستمرار عليها فترةً طويلة.

إدوارد يعلن إصابته بشلل في المعدة

وكشف الممثل المصري إدوارد عن تضرره من حقن التخسيس؛ إذ تسببت بإصابته بشلل مؤقت في المعدة، موضحا أنه انتظم لفترة على حقن "ساكسيندا" لعلاج السمنة Saxenda، ثم تروليسيتي trulicity. 

وشرح إدوارد، عبر خاصية "ستوري" في حسابه على "إنستجرام"، تفاصيل الواقعة كاملة، موضحا أن الغرض من منشوره توعية جمهوره. 

وقال الفنان المصري، تحت عنوان "کلام مهم جدا": أنا كنت باخد حقن التخسيس تحت إشراف دكتور تغذية، ونزلت حوالي 15 كيلو، كنت باخد حقن ساكسيندا ودي الدكتورة نصحتني بيها، ومشكلتها بتتاخد كل يوم في المعدة، بس ميزتها إننا نقدر نتحكم في الجرعات عشان ما نتعبش".

وأضاف: "وصلت للوزن اللي عايزه ودخلنا في مرحلة التثبيت، والدكتورة طلبت مني أروح لدكتور جهاز هضمي أعمل تحاليل ونطمن، بس أنا طنشت وقولتلها أنا هاخد حقن أسبوعية بدل اليومية عشان تعبت من كل يوم حقنة".

وأكمل: في ناس نصحوني بحقن "تروليسيتي" لأنها أسبوعية ومش قوية، وفضلت أخد تروليستك لمدة 5 أسابيع كل أسبوع حقنة، وكانت تمام معايا وكانت دكتورة التغذية بردو بتسألني عن التحاليل كل فترة وكنت بطنش لأني تمام مش حاسس بحاجة، وكمان لا كنت بتخن ولا بخس وباكل عادي طبعا برده مواظب على الدايت مع الدكتورة لحد الأسبوع اللي فات.

وقال إدوارد: "فجأة مش جعان خالص وقعدت 4 أيام مش بدخل حمام ولا قادر آكل ووجع في معدتي جامد، وقالتلي دكتورة التغذية وقف الحقن وروح لدكتور جهاز هضمي فورا وعملت كده".

وتابع: "روحت لدكتور قالي حصلي شلل مؤقت من الحقن في المعدة، وكان مفروض تتابع معايا مع دكتورة التغذية، قولتله أنا اللي كنت بطنش عشان كنت تمام، قالي الحقن مش وحشة ومفعولها كويس بس أنا بنصح أقصاها 3 شهور بس تاخدها وتوقف فتره وترجع تاني، بس لازم طبعا بردو متابعة مع دكتور تغذية".

وكشف الفنان المصري أنه منذ أسبوع وهو يخضع للعلاج بعد إصابته بشلل مؤقت في المعدة، وتحدث عن حالته الصحية حاليا، قائلا: "بقالي أسبوع بتعالج وعملت كل التحاليل حتى صبغة على الكلى، والحمد الله ماعنديش غير شوية زيادة أملاح زي كل المصريين".

وأكمل: "بطني بتتحسن واحدة واحدة ولسه المعدة وجعاني، والدكتور قالي معايا من 8 لـ9 أيام وأرجع عادي، وإن شاء الله هبقى كويس".

واختتم إدوارد منشوره: أنا حكت لكم تجربتي عشان بقولكوا إن الحقن مش وحشة وجابت نتیجة هایلة معايا، بس لازم مع دكتور التغذية ودكتور جهاز هضمي وكمان دكتور قلب لو أمكن عشان سرعة ضربات القلب، وأتمنى أكون فدتكم بمعلومات كويسة عن تجربتي، وربنا يشفي أي حد تعبان وأشوفكم دايما كويسين.

فنانون أصيبوا بشلل في المعدة بسبب حقن التخسيس

وخلال الأشهر الماضية، كشف أكثر من فنان عن مشكلات صحية طالته بسبب حقن التخسيس وما نتج عنها من شلل في المعدة، كانت آخرهم الفنانة الشابة هند عبدالحليم ومنى فاروق.