حدث ما توقعه بالضبط.. محمود سعد يروي تفاصيل الأيام الأخيرة في حياة نبيل الحلفاوي

تحدث الإعلامي محمود سعد عن الأيام الأخيرة في حياة الفنان الراحل نبيل الحلفاوي، وتفاصيل المرض الذي عانى منه. وقال سعد من خلال فيديو نشره عبر قناته على YouTube: "اللي حصل زوجة الفنان نبيل الحلفاوي قالتلي من 20 يوم أنه حالته وحشة جدا، كلمته قالي "أنا تعبان شوية" وكان آخر مرة شفته في أبريل في وداع صلاح السعدني، لقيته خاسس أوي". وأضاف: "كنت أنا وبلبل في دفنة أسامة أنور عكاشة، نبيل قالي إنت عارف إني عامل خريطة للمدفن بتاعي، الطريق صعب وعايز ولادي يوصلوا بسهولة". وتابع:"نبيل كان يخبرني دائمًا بأنه لا يحب الخروج من المنزل، ويُفضل الجلوس بمنزله بشكل مستمر، وكان يقول: وبعدين يا محمود هخرج وأسيب نادية مراتي لمين، نادية بقت تعبانة وأنا اللي بسندها". وقال:"في الأيام الأخيرة في المستشفى كنت بتكلم مع وليد الحلفاوي ابنه، قالي أنا عايز أقولك على حاجة "بابا قالنا كلام مهم عن علاقتكم ببعض وقالنا خلوا بالكم من محمود لما يحصلي حاجة هو اللي هيعملكم كل حاجة لما تحتاجوا حاجة خليكم معاه"، لأنه في يوم من الأيام وإحنا راجعين من دفن الكاتب أسامة أنور عكاشة قالي أنا عندي مشكلة أن التربة بتاعتنا في مكان ضيق هنعمل إيه، وقالي إنه عامل خريطة للمدفن للطريق ليه". وأكمل سعد: "لما روحنا المقابر وكنا بليل توهنا وبقيت أضرب كف على كف، مع أني كنت كلمت وليد الحلفاوي وقلت له على الخريطة، لكن توهنا زي ما نبيل الحلفاوي كان قايل". وكشف محمود سعد أن الراحل كان يعاني من سرطان من الدرجة الرابعة، وأن حالته تدهورت بسرعة شديدة.