بسبب المستشفى.. ابنة بشير الديك تكشف عن تعرض والدها للإهمال الطبي: "حالته بتسوء وزاد عدم وعيه وذراعه وارم"

كشفت دينا ابنة السيناريست الكبير بشير الديك عن تعرض والدها للإهمال الطبي داخل المستشفى التي يرقد بها حاليا، والتي نقل إليها الساعات الماضية لوضعه في العناية المركزة للمرة الثالثة.

وكتبت دينا عبر حسابها على فيسبوك: صباح الخير جميعاً، للأسف بابا دخل تاني الرعاية في إحدى المستشفيات، والمرة دي الموضوع بقى مختلف خالص، للأسف حالته بعد ما كانت بتتحسن شوية بقت ترجع تسوء تاني.

ابنة بشير الديك تتحدث عن تعرض والدها للإهمال

وأضافت : المشكلة في الإهمال وعدم الاهتمام بالمرضى، رحنا امبارح وقت الزيارة لاقينا بابا زاد عدم وعيه وذراعه وارم جداً وبيؤلمه وماحدش كان واخد باله والمفروض أنه في الرعاية.

وتابعت: "المشكلة التانية أنه بقى لا قادر يمضغ الأكل ولا يبلعه، ده غير أنه كان جعان على غير العادة لأنه بالرغم من عدم قدرته على المضغ ولا البلع لكنه أول ما بدأ يأكل بدأ وعيه يزيد، إزاي دي رعاية، ومن كتر قلق ماما وعدم ثقتها في الخدمة المقدمة اللي هي مش رخيصة بالمناسبة بقت بتشوف الأدوية اللي بياخدها وبتعرف تأثيرها والآثار الجانبية بتاعتها وبدأت تناقش الدكاترة في الأدوية دي.

أسرة بشير الديك تتعرض لموقف صعب من طبيب والدها

واستكملت: راح دكتور الرعاية المحترم المتواجد ساعتها قال لها لو مش قادرين على مصاريف المستشفى روحوا مستشفى تانية، هل ده رد محترم لدكتور رعاية في مستشفى معروفة بتميزها في الرعاية؟، الصراحة مش ده أول دكتور رعاية هناك يكون بالجليطة دي، وللأمانة الوحيدين المهذبين هناك دكتور صافي مديرة الرعاية ودكتور أحمد سامي دكتور الرعاية، وللأسف مش موجودين طول الوقت.

واختتمت ابنة بشير الديك: إن شاء الله نخرج منها على خير ونروح مستشفى تانية في أسرع وقت، برجاء الدعاء لبابا أنه يقوم بالسلامة ويخرج من النفق المظلم اللي هو فيه ده، آمين.