حمزة العيلي لـ محمد جمعة: الله يسامحك عشان فضحت سرنا

وجه الفنان حمزة العيلي رسالة لصديقه الفنان محمد جمعة، بعدما كشف الأخير عن مروره بضائقة مالية ودور العيلي في مساندته فيها.

وكتب حمزة العيلي عبر حسابه على "فيسبوك" في رسالته: "أخي وصديقي وحبيبي محمد جمعة الفنان بكل ماتحمله الكلمة من معنى وصدق واحترافية الممثل الخطير والمخرج المسرحي الرائع والمؤلف المدهش وصاحب الصوت الجميل، بحبك جدا وربنا يديم ما بينا المحبة والود والصداقة والأخوة، وما أنساش الهدية الغالية اللي جبتهالي بعد مولد الحبيب عمر ومحتفظ بها إلى الآن".

وتابع حمزة العيلي: "والله يسامحك ياعم جمعة عشان فضحت سرنا، ربنا يكرمك ويسعدك ويزيدك ياحبيبي ويفرحك بعمر وكاميليا يا صاحب الخير والكرم والأصل والجدعنة".

محمد جمعة يكشف تفاصيل مساندة حمزة العيلي في ضائقة مالية تعرض لها

وكان محمد جمعة حكى في لقاء ببودكاست "فايق ورايق" مع إبراهيم فايق عن موقف لا ينساه لحمزة العيلي عندما وقف بجانبه وسلفه مبلغا من المال كان في أشد الحاجة إليه.

وقال محمد جمعة: "قعدت أنا ومراتي 5 سنين ما نخلفش وكان الحل إننا نعمل حقن مجهري فالمشكلة بقى إن كان لازم مراتي تاخد كل يوم حقنتين تثبيت، طبعا بعيدا عن شقائها الحقنتين دول كانوا في اليوم بـ250، بتدفعهم لمدة تقريبا 6 شهور يوميا، ربنا كان بيبعت، فجأة مراتي مفيش غير حقنة واحدة وأنا مفيش مليم وأنا من الناس اللي ما بعرفش استلف، عيطت عياط لا يمكن حد يتخيله لأن الأمل اللي بتحلم بيه بيضيع قدامك لأن أنت عاجز أنك توفر 250 جنيه عشان تجيب حقنة".

وتابع محمد جمعة ليحكي عن مساعدة زميله الفنان حمزة العيلي له قائلا: "اتصلت بصديق ليا اسمه الفنان حمزة العيلي معرفش إيه اللي خلاني أكلمه قلت له بص يا حمزة أنا الوضع كذا كذا وأنا حرفيا دلوقتي مفيش في جيبي مليم، قالي إنت فين كنت وقتها ساكن في حدايق الأهرام، قالي تعلالي دلوقتي حالا روحت ليه وفاكر عمري ما هنسى أخدت منه 1500 جنيه وإلى وقتنا هذا بقول لحمزة إنت ليك في عمر ابني، دا موقف مش بنساه ليه".