«القوي اللي يمسك نفسه عند الغضب».. تامر حسني يوجه نصيحة للجمهور قبل شهر رمضان

وجه الفنان تامر حسني نصيحة لجمهوره ومتابعيه بمناسبة حلول شهر رمضان، مطالبا إياهم بالتسامح فيما بينهم ونشر الرحمة، والعمل بما قاله الرسول صلى الله عليه وسلم وهو عدم رد الإساءة بالغضب والإساءة.

تامر حسني يوجه نصيحة لجمهوره

وكتب تامر حسني معلقا على صورة، عبر حسابه الرسمي بموقع تبادل الصور والفيديوهات "إنستجرام": على دخلة شهر رمضان المبارك أحب أبدأ أشارك معاكم بعض المعاني الجميلة اللي بتعلمها في حياتي دي صورة عظيمة جداً حركت جوايا معنى جميل …. تفتكروا لو اللي شايل كل الناس دي على ضهره لو حد من اللي شايلهم غلط فيه أو ظلمه أو حد سخنه و خلاه يقول كلام مش فيه أو شتمه حتى شتيمه صريحة".

وتابع: "لو اللي شايل الناس دي كلها قرر يقوم و يقف و يرد عليه !! هيحصل إيه للناس دي كلها اللي ملهاش ذنب !!؟ أكيد هيقعوا و يتعوروا و هما ملهمش ذنب و خصوصاً إن اللي شايل الناس دي كلها هو شايلهم لإنه بيحبهم كلهم فا أكيد هيلتمس للي بيحبهم مليون عذر و عذر و خصوصاً ان اللي متشالين عشان هما فوق فا مش شايفين معاناة اللي شايل عشان كده ربنا بيدي الشخص المسئول عن ناس كتير أو موظفين أو عيلة قوة تحمل و صبر و حكمة و رحمة مش عند حد و عشان كده ربنا بيباركله في مشواره اللي ماشيه و هو شايل كل دول من غير ما يشتكي بل بالعكس مستمتع و هما على ضهره".

واختتم تامر حسني حديثه: "وصف الرسول عليه الصلاة و السلام الرجل القوي الشديد باللي بيمسك نفسه عند الغضب مش اللي بيتخانق و يضرب يلا نبدأ الشهر بالتسامح والرحمة و رمضان كريم على الجميع".