تعليق غاضب من طه دسوقي على تصوير جثمان الراحل سليمان عيد أثناء تشييع جنازته بالأمس

علق الفنان الشاب طه دسوقي على تصوير جثمان الفنان الراحل سليمان عيد أثناء تشييع جنازته بالأمس من داخل المجمع الإسلامي بمدينة الشيخ زايد.

وكتب دسوقي، عبر حسابه على "فيسبوك": "مفهوم وجود التغطية الإعلامية أو التواجد الإعلامي في أثناء تصوير الجنازات أو المهرجانات وحفلات التكريم والعروض الخاصة".

وتابع: "من إمتى بقى أصبح الفنان "كبني آدم" هو نفسه محتوى، يعني ليه فيه تغطية إعلامية ماشية مع الفنان ده في مناسباته الشخصية سواء بقى فرح أو عزاء والأدهش حتى الدفن".

واستكمل: "ليه يبقى فيه محتوى عنوانه "شاهد فلان بيجوّز بنته"، فلان والدته توفت، شاهد معازيم فرح فلان، شاهد انهيار الفنانة، ليه والله".

واستطرد: “ليه شاهد الفنان وزوجته أثناء حضورهم فرح صديقه”، إيه المحتوى في بني آدم ماشي في الشارع مع مراته أو بيحضروا مناسبة ملهاش أي علاقة بفن؟".

وتابع: “إيه السبق في تصوير جثمان وليه أصلًا تصوير جوه المقابر، طبعًا مش كل حد رافع تليفونه بقى صحفي لأن الصحفيين المحترمين مبيعملوش كده، ده ياخدنا لسؤال تاني معلش.. لو نزلت رفعت التليفون صورت واحد قاعد مع مراته على ترابيزة في مطعم هيقوم يكسر عضمك لأنك بالنسبة له متحرش أو متطفل".

وواصل "لكن لو اللي بيتصور ده فنان فاللي بيصوره وارد يكون صحفي ياعم وأنت راجل محبوب وسلم على جمهورك وإعمل لنا باي وأنت بتاكل وقول لمراتك تعمل كمان، ولا أنت مغرور ولا إيه ياعم من تواضع لله رفع".

واختتم دسوقي: “سؤالي لأصحابي الصحفيين وأساتذتي في مجال الصحافة والإعلام، لما أبقى ماشي في الشارع أو بحضر مناسبة ملهاش علاقة بالشغل وألاقي حد بيصورني فيديو أتعامل معاه أنه صحفي ولا متحرش؟”.

جنازة سليمان عيد

وكان جثمان الفنان سليمان عيد، قد وارى الثرى بالأمس من المجمع الإسلامي بالشيخ زايد إلى مثواه الأخير بمقابر العائلة بحضور عدد كبير من النجوم.