كريم فهمي: «رغم انتمائي للأهلي لكن الزمالك له فضل كبير في تكويني ولعبت فيه 9 سنوات»
كتب: أمنية مدحت
كشف الفنان كريم فهمي عن تجربته الكروية المبكرة، مشيرًا إلى أنه لعب لمدة عامين في النادي الأهلي و9 سنوات في نادي الزمالك، رغم انتمائه المعروف للنادي الأحمر.
كريم فهمي: لعبت 9 سنوات في الزمالك
وقال خلال لقائه مع الإعلامية لميس الحديدي في برنامج «كلمة أخيرة» على قناة «ON»:«أنا لعبت سنتين في الأهلي، و9 سنين في الزمالك، وفي نفس الوقت كنت بادرس في مدرسة كويسة جدًا، وكان فيه فرق ثقافات كبير بين مجتمع الكورة والمدرسة».
وأضاف:«كنت بالعب في سن صغيرة جدًا في الأهلي، وكان نفسي أكمل وأبقى لاعب كبير، لكن وقتها ماكنش فيه ملاعب كفاية غير اللي في الجزيرة، وكانوا عايزين يودونا نادي النيل. ساعتها كنت بلعب مع شريف إكرامي، وكبرنا مع بعض وبقينا صحاب، وكان معانا كمان شيتوس وغيرهم».
وأوضح أن والده رغم كونه أهلاويًا، اقترح عليه الانتقال إلى الزمالك، قائلًا: «قال لي جرّب، وبالفعل رحت واستقبلوني كويس جدًا، وكنت لاعب كويس، وكملت هناك وبقيت لاعب أساسي. الزمالك له فضل كبير في تكويني، سواء في الشخصية أو الالتزام، واتعلمت جوه النادي حاجات كتير، وكان فيه ناس جدعان جدًا في ميت عقبة، ولعبت مع أحمد حسام ميدو كمان».
وعن صفقة انتقال اللاعب أحمد سيد زيزو، علّق فهمي قائلاً: «ماقدرش ألوم جمهور الزمالك على زعله، وأكيد فيه أمور كتير في الكواليس إحنا ما نعرفهاش، ومنقدرش نلوم اللاعب على كل حاجة. إحنا كأهلاوية زعلنا لما رمضان صبحي مشي، وهو كان طفل في الأهلي ومتوقعين يبقى أسطورة، وزعلنا وقتها وقلنا إزاي يمشي».
وختم كلامه بالتأكيد على أن العلاقة بين الناديين يسودها احترام كبير، قائلاً: «أنا بعذر جمهور الزمالك جدًا، لأنه في النهاية جمهور وفيّ. لكن بصراحة، فيه علاقة حب بين الأهلي والزمالك أكتر من الكره. ده تنافس بيبني الشخصية والانتماء».
