خيري رمضان: تامر حسني مش صديقي ودا سبب هجومي على بسمة بوسيل

تحدث الإعلامي خيري رمضان عن هجومه على الفنانة بسمة بوسيل بعد حديثها عن فترة طلاقها من الفنان تامر حسني.

وقال خيري رمضان، خلال لقائه في برنامج "منا وفينا" من تقديم هبة حيدري عبر قناة "المشهد": "لما هاجمت بسمة بوسيل مكنش هدفي ركوب "الترند" أنا فكرت في حاجة واحدة بس الرسالة لما زوجة بتطلع تتكلم عن زوجها أبو أولادها والكلام رأيت فيه اللا منطق، وأنا قضيتي مش تامر حسني خالص، أنا قضيتي كل زوجة ممكن تشوفني وتختلف مع زوجها ودا بيحصل كتير تراعي أن العلاقة عندما تنتهي الاحترام هي إنها انتهت، أن من تتحدثين عنه هو أبو أولادك، وأبو الأولاد بيجرح الأولاد، كنتي تبحثين أنت عن "الترند" مش أنا أنتي اللي صنعتي التريند يثري قيمة غير محترمة في المجتمع".

وتابع خيري رمضان: "أنا قلت "أدت" بشكل رائع وكانت مجهزة تماما لكن اعترضت على المضمون واعتراضي لا يقلل من شخصها أنا مليش علاقة بشخصها، بس لما حد يعيش مع حد أكتر من 10 سنين ويجي النهاردة يقولي أنا من أول يوم بتعذب".

وأضاف خيري رمضان: "هجومي ليس دفاعا عن تامر حسني، أنا لم أر تامر حسني منذ سنوات بشوفه أحيانا في فرح، آخر لقاء عملته معاه كان من أكتر من 8 سنين، ولا تجمعنا صداقة بحبه على المستوى الإنساني وأعرف والدته لكن مش أصدقاء خالص ولم يكلمني ولم أكلمه، هيسمعنا أو غيره هيسمعنا، تامر مش صديقي لم أكن أفكر في تامر، أنا كنت أدافع عن مبدأ العلاقة الزوجية وحق الأولاد في حياة كريمة، دول بيروحوا المدرسة لما حد من زمايلهم يقولهم هو باباك كان وحش أوي كده، لما اطلع أتكلم في الدين وواحد بيصلي قدامي الخمس فروض بأمارة إيه، اللي بيكلمني يديني أمارة بالزي ولا بالغناء ولا بالدلع، بسمة مدتنيش أمارة أنها تشترط بعد 5 سنين من انفصالها وقبلها بوقت قليل بتتحدث عن إحنا راجعين لبعض وترجع تقول أن من أول يوم علاقة مدمرة وكل يوم بتبكي وفكرت في الانتحار مين الإنسان اللي يتحمل كل دا يبقى عندها خلل وهي المسئولة".

واختتم خيري رمضان كلامه: "قعدتي سنين منفصلة افتكرتي دلوقتي بس العذاب بعد ما ولادك كبروا، افتكرتي أن تطلي على الناس ويشوفوكي وأنتي عندك أولاد من هذا الرجل، أنا شفتها أنها بتحاول العودة للأضواء، مقدرش أدخل في نيتها إذا كانت عايزة تنتقم منه ولا تستغله".