دنيا عبد العزيز للأمهات الجدد: بلاش نصايح خالتي وعمتي واسمعي كلام الدكاترة

كشفت الفنانة دنيا عبد العزيز عن الشيء الذي تغير في شخصيتها بعدما أصبحت أم، ونصائحها للأمهات الجدد.

وقالت دنيا عبد العزيز في برنامج "ساعة ونس" عبر قناة cbc سفرة: "أكتر حاجة اتغيرت في حياتي بعد ما بقيت أم إني بقيت بخاف بقى عندي خوف على بنتي وعلى نفسي وخوف من المستقبل خوف في المطلق، كان من بعد أمي ما توفت بطلت أخاف لحد ما بنتي اتولدت بدأت الحكاية تتغير خالص بقيت بخاف عليها وبقيت بخاف من كل حاجة عشانها".

وعن نصيحة توجهها للأمهات قالت دنيا عبد العزيز: "أنا معنديش خبرة لسه بتعلم مع بنتي لكن أكتر نصيحة أقولها لأي أم أو ست حامل وقربت تولد متسمعيش كلام حد اسمعي كلام الدكاترة وبس لأن إحنا بيبقى حوالينا ناس كتير جدا بيحبونا ويخافوا علينا لكن كل واحد هيقول لنا معلومة غير التانية وكلهم صح لكن هيبقى لخبطة كبيرة وتشتت فظيع فناخد برأي الدكتور واللي يقول عليه هو اللي نعمله بس لأني هسمع من هنا ومن طنط وخالتي وعمتي الدنيا هتتلخبط وأي أم هتتبرجل فنسمع من جهة واحدة ونركز جدا منتشتتش".