«أنا عايز حقي».. شوبير ينتقد هاني سعيد بعد تصرفه الغاضب على الهواء
كتب: أمنية مدحت
انتقد الإعلامي أحمد شوبير، هاني السعيد، المدير الرياضي لنادي بيراميدز، بعد تصرفه أمس، تجاه مذيع قناة أون سبورت، عقب تعادل فريقه مع صن داونز في جنوب أفريقيا في ذهاب نهائي دوري أبطال أفريقيا.
وانفعل هاني السعيد على مذيع الاستديو التحليلي، في مداخلة بعد المباراة، وقام بغلق الهاتف في وجهه، اعتراضًا على مقاطعته الحديث عن مباراة الفريق مع سيراميكا كليوباترا.
وقال أحمد شوبير في تصريحات إذاعية: «أتعجب من تصرف هاني سعيد بالأمس مع مذيع أون سبورت، يعني الراجل يا كابتن هاني بيكلمك بعد الماتش يباركلك وفرحان تقوم تقفل السكة في وشه؟!».
وتابع: «طب ليه يا ابني هو لا بيشتغل عندك ولا ليك عنده حاجة، والراجل مغلطش في حقك ولا في حق ناديك، يبقى ليه تقفل السكة في وشه، مالك يا كابتن هاني في إيه».
وأضاف: «أنا بس عايز أسأل حضراتكم لو أنا كنت مكان المذيع وقفلت السكة في وش الضيف كان ايه اللي هيحصل، تحويلي إلى المجلس الأعلى للإعلام، قرار بإيقافي من المجلس الأعلى للإعلام، منتهى الاستهانة، منتهى المهانة، وكان طبق عليا القرار فورا من تاني يوم».
واختتم: «هل حد بيطلع يعتذرلنا، هي القناة ملهاش حق، هو أحنا ملناش حقوق، زي ما علينا المفروض يكون لينا، وأنا بطالب المجلس الأعلى للإعلام بالتدخل، أنا عايز حقي».
