برسالة مؤثرة.. حمزة علاء يودع الأهلي وجماهيره

نشر حمزة علاء، حارس مرمى الأهلي السابق، رسالة مؤثرة بعد قراره بالرحيل عن القلعة الحمراء بنهاية الموسم الماضي.

وقال حمزة علاء في رسالته عبر حسابه الرسمي على إنستجرام.: "أكيد الكلام جاي متأخر وعشان كده حابب أعتذر، من حوالي شهر أخذت أصعب قرار في حياتي، وهو إني أسيب بيتي بعد 16 سنة من عمري قضيتهم في النادي الأهلي، وأضاف موضحا سبب قراره الصعب: "قرار الرحيل كان صعبًا، لكن كان لازم أن أفكر في مستقبلي.. يمكن الفرصة مجتش زي ما كنت أتمنى بس كل حاجة بتحصل بيبقى ربنا كاتبها ورب الخير لا يأتي إلا بالخير."

ووجه حمزة علاء الشكر لجمهور الأهلي، قائلا: "لجمهور النادي الأهلي العظيم محبتكم وشكركم عمرهم ما كانوا مرتبطين بعدد الدقائق اللي لعبتها دائما كنتوا سند في كل لحظة، في كل بطولة.. حسيت معاكم إني أحسن حارس في العالم وأنا بلعب في بطولة أفريقيا والأولمبياد، كل اللي طلبته إنكم تفضلوا فاكرين إني كنت واحد منكم وابن من أبناء النادي الأهلي.

كما قال شكرا لإدارة النادي الأهلي على كل لحظة حسيت فيها إني جزء من الكيان.. وأقول لزملائي إنتوا إخواتي وعيلتي اللي عمري ما هنسى أيامها وبتمنى ليكم كل التوفيق والنجاح." ووجه رسالة مماثلة للمدربين والعمال: "لكل مدرب اتمرنت معاه داخل النادي، شكرا من كل قلبي على كل لحظة دعمتوني فيها أو علمتوني فيها حاجة، ولكل عامل تشرفت بالشغل معاه أنتم عارفين معزتكم عندي."

اختتم حمزة علاء رسالته برسالة وفاء وولاء للنادي: "لشعب الأهلي هفضل دائمًا مشجع للكيان من قلب التالتة شمال ويا رب أرفع راسكم وأكون عند حسن ظنكم في خطوتي الجاية، وتكونوا دائما في ظهري وسند ليا زي ما طول عمركم عودتوني.. أشوف وشكم على خير.. ابنكم حمزة علاء."