رانيا فريد شوقي: يحيى الفخراني قالي الله يكون في عون اللي هيتجوزك

استعادت الفنانة رانيا فريد شوقي ذكريات مشاركتها في مسلسل "يتربى في عزو"، الذي جمعها بالفنان الكبير يحيى الفخراني، كاشفة عن ترددها في قبول الدور في البداية، قبل أن يطمئنها الفخراني بنفسه ويشجعها على خوض التجربة.

وكتبت رانيا عبر حسابها على "فيسبوك": "كنت مرعوبة أول ما اتعرض عليا دور (إيناس) في يتربى في عزو، وخوفت أعمله واعتذرت فعلًا، لحد ما دكتور يحيى كلمني بنفسه وقاللي: (إنتي اعتذرتي؟) قلت له: (آه، خوفت) قاللي: (ما تخافيش… الدور حلو وهيفرق معاكي)، وفعلًا… من أنجح الأدوار اللي عملتها وساب علامة".

كما روت موقفًا طريفًا من كواليس التصوير قائلة: "كان في مشهد في شرم الشيخ، المفروض إن أنا مراته وراح بيا نسهر، و(إيناس) كانت ناوية تتلكك على أي خناقة عشان تسيبه.. وفي مكان السهرة لقينا رقاصة بتتدلع على حمادة، ويا دوب لقيت (إيناس) بتزغر للرقاصة، ولحمادة، وضاربة بوز وعينيها بتطلع شرار! أتاريهم كانوا يعرفوا بعض، و(إيناس) قلبتها نكد وسبته ومشيت".

واختتمت رانيا القصة بضحكة قائلة: "وإحنا بنعمل بروفة المشهد، فجأة لقيت دكتور يحيى بيضحك أوي! قلت له: (في إيه؟) قاللي: (الله يكون في عون اللي هيتجوزك! ده مش تمثيل)".