رحمة حسن تكشف تعرضه لأزمة في عيادة تجميل :اتخدعت وتساقط شعري مستمر منذ عامين

كشفت الفنانة المصرية رحمة حسن عن معاناتها النفسية المستمرة التي أثرت بشكل واضح على حالتها الجسدية، وتحديدًا في شكل شعرها الذي يتساقط يوميًا منذ عامين، بحسب ما أعلنت عبر حسابها الرسمي على إنستجرام.

ونشرت رحمة صورة مؤثرة تُظهر تساقط شعرها، وكتبت تعليقًا صريحًا قالت فيه:أنا شعري كان خفيف شوية، وتعبان، بس مكانش بيقع بالشكل اللي يخوف. كان طبيعي يقع كام شعرة، زي أي حد. لحد ما قررت أروح عيادة Zo في الزمالك، لأنهم بيقولوا إنها من أفضل العيادات في التجميل والعناية بالشعر.

وتابعت: روحت، وكشفت، وعملت كل التحاليل المطلوبة. الدكتورة قالتلي إن كل حاجة تمام، بس الحديد ناقص شوية وممكن آخد حديد، وعرضت عليا نعمل جلسة بلازما من دمي، وقالتلي إنها آمنة 100%.

واضافت: وافقت، وطبعًا كنت واثقة.لكن قبل الجلسة، سألتني: ضغطك أخباره إيه؟ قولتلها مش عارفة بصراحة. وقالتلي "ماشي"...
وفجأة لقيت إن الجلسة مش بس بلازما! عملتلي ميزوثيرابي كمان، وده مكانش في الاتفاق، والأسوأ إنها حطتلي مينوكسيديل في الحقنة من غير ما تقولي!

واستكملت: ماعرفتش غير وأنا في البيت، لما بدأت أحس إن ضربات قلبي مش طبيعية، ودوخة وتعب شديد، ببص على الفاتورة، لقيت مكتوب إن في مينوكسيديل! وده أنا أول مرة أستخدمه، ومن غير ما أعرف أو أوافق.

وقالت: من ساعتها وشعري بيقع كل يوم، مش بس كده، حتى البيبي هير اللي بيطلع بيقع تاني، ومفيش جديد بيطلع، أنا كنت رايحة أعمل بلازما بس، ماكنتش مستعدة يدخلوا مادة زي دي في جسمي من غير إذني.

واختتمت، ولو كنت أعرف، عمري ما كنت هروح. كان عندي ثقة، بس بعد اللي حصل دي آخر مرة أروح فيها، وللناس اللي مش عارفة: المينوكسيديل لما بتبدأيه ما ينفعش تبطليه فجأة، لأنه بيأثر على الشعر بشكل سلبي بعد التوقف، وده اللي حصللي فعلاً.

دلوقتي، لا شعري زي الأول، ولا حتى نفسيتي... حسيت إني اتخدعت."

رحمة حسن لم تظهر في أي أعمال فنية منذ فترة، وكان آخر ظهور درامي لها من خلال مسلسل "إيجار قديم" الذي عُرض عام 2022، وشارك فيه نخبة من النجوم، من بينهم شريف منير، حازم سمير، وميمي جمال، وهو من إخراج طارق رفعت.

وتأتي هذه المشاركة من رحمة لتسلط الضوء على أهمية الاعتراف بالمشاكل النفسية ومشاركتها بدلاً من إخفائها، خاصة في مجتمع نادرًا ما يعترف فيها الشخص بمعاناته النفسية.