أروى جودة لـ"العاصمة": يسرا محتاجة متحف لأعمالها.. وتفاصيل فرحي صعبة مكنتش أتخيلها

أشادت الفنانة أروى جودة، بالدورة الثامنة من مهرجان الجونة السينمائي الدولي، على هامش حضورها الفعاليات، كما تحدث عن تفاصيل حفل زفافها المنتظر.

 وعلقت على سر اختيارها فستان من اللون الأبيض في حفل الافتتاح، وعن إذا كان له علاقة باقتراب موعد زفافها خاصةأنها ظهرت برفقة خطيبها، قائلة: "أنا عموما بحب اللون الأبيض، وده مالهوش علاقة بكوني عروسة أو لأ، بعد ما خسيت شوية حلوين بقيت حاسة إن عايزة ألبس أبيض طول الوقت".

وتطرقت لاستعدادات حفل زفافها: "التفاصيل صعبة أوي، وكنت بفتكر أصعب حاجة هو فستان الفرح، تفاصيل عمري ما كنت أتخيلها في حياتي".

وتحدثت عن الدورة الجديدة من الجونة: "مش مصدقة إننا وصلنا للدورة الثامنة، أنا لسه حاسة إننا في أول دورة ومبسوطة جدا بالنجاح والإقبال ده، وإن احنا بنعرض أفلام حلوة، والمشاريع اللي بيدعموها ماديا وهذا شئ جيد للصناعة، والأحلى شعار المهرجان سينما من أجل الإنسانية، وده المهم في الفن يكون رسالة".

وعن تكريم منة شلبي في مهرجان الجونة، قالت: "مبسوطة أوي إن نجمة زي منة شلبي إنها تتكرم وتفرح بنفسها وتاخد دعم إنها تكمل وهي تستاهل أكتر بكتير.. وهي ممثلة رائعة".

أما عن معرض الفنانة يسرا، فقالت: "معرض مش كفاية عليها هي محتاجة متحف، وطبعا المعرض يجنن وفي حاجات كتيرة أوي مختلفة".