مدحت شلبي يعتذر للخطيب على الهواء: ماكانش قصدي أسبب له أي ضيق

تقدم الإعلامي مدحت شلبي باعتذار رسمي على الهواء إلى الكابتن محمود الخطيب، رئيس النادي الأهلي، مؤكدًا أن الانتقادات التي وُصفت بالقاسية لم يكن يقصد بها الإساءة أو إحداث أي حالة من الضيق.

وخلال لقائه مع الإعلامية أسما إبراهيم في برنامج «حبر سري» المذاع عبر شاشة قناة القاهرة والناس، قال شلبي: «بدايةً أنا بعتذر عن الانتقادات القاسية اللي اتقالت في حق الكابتن محمود الخطيب، أنا عمري ما بطلع على الشاشة غير لما يكون عندي مصدر، وكان الغرض دايمًا هو الاطمئنان عليه، لأنه معشوق الملايين، وأي خبر عن تعبه بيزعل الناس كلها وأنا منهم».

وأضاف: «في إحدى الحلقات كان ضيفي الكابتن مصطفى يونس، واتقال قدامنا خبر عن سفر الكابتن الخطيب لإجراء عملية جراحية، ومصطفى يونس تأثر جدًا وبكى على الهواء، وده كان المشهد اللي حصل، وكل اللي كان في دماغي وقتها هو القلق عليه».

وتابع شلبي مؤكدًا تقديره للخطيب: «أنا بقوله متفولش على نفسك عشان ما يتعبش، ويعز عليّا جدًا يكون زعلان مني، خصوصًا إن بينا ذكريات طيبة وعِشرة طويلة، وبقدم اعتذار شخصي للكابتن محمود الخطيب على الهواء، لو كنت سببت له أي ضيق، ماكانش ده قصدي خالص، وأنا بقدملك اعتذار واضح وصريح، وأتمنى ما تكونش زعلان مني».

وفي سياق آخر، تحدث مدحت شلبي عن تأثير مواقع التواصل الاجتماعي، قائلًا: «السوشيال ميديا بقت آفة العصر، واللجان الإلكترونية بتفرض رأي وهمي على الجمهور، وبتصنع نجاح مزيف أو إسقاط مزيف، وده مش حقيقي».

واختتم حديثه بالتأكيد على أهمية الحزم في الإدارة، مضيفًا: «لازم المسؤول يكون قوي في قراراته وما يجريش وراء السوشيال ميديا ويحكمها بالعاطفة، الإدارة بيحكمها العقل، ولازم العقل يتقدم على أي حاجة، وكمان لازم يكون في لائحة وقانون يتطبقوا على الجميع، وعلى كل الأندية بدون استثناء، وتُطبق قواعد اللعب النظيف».