وقالت مرام: "أنا بحب أحمد فهمي جدًا وبحترمه على المستوى الشخصي والمهني، لكن فكرة ارتباطنا إشاعة بتضحك. هو فنان محترم وسعيدة بالشغل معاه، لكن مفيش أي حاجة زي ما اتقال".
وأضافت: "لو اتقدم لي فنان أو شخص مصري للخطوبة هوافق عادي، أنا بحب مصر جدًا، وبمجرد ما بسيبها ببقى مشتاقة لها".
وعن نظرتها لفكرة الفراق والموت، أوضحت: "كنت دايمًا بخاف أفقد حد قريب مني، لكن بعد ما فقدت ناس من عيلتي بقيت مقتنعة أكتر إن دي سنة الحياة. مرّيت بتجارب فراق كتير، مش بس وفاة، لكن كمان ناس بعدت عني وهم عايشين، وده علمني أكون أقوى".
وكشفت عن تجربة أثرت فيها قائلة: "حلمت قبل كده بوفاة والدي وكنت حاسة إني مش قادرة أعمل أي حاجة، الإحساس كان صعب جدًا. بقالي فترة مفرحتش بجد، ومحتاجة فرحة قريبة، أحضر فرح حد أو أشوف نجاح حد قريب مني وأفرح له".
وعن الدراما السورية، قالت مرام: "الدراما السورية مرت بفترة تراجع، وده طبيعي في أي صناعة، لكن السنة دي مختلفة، وفي شغل قوي جدًا. الجمهور هو اللي بيصنف، ومفيش حاجة بتفضل في القمة طول الوقت".
وأشارت إلى أنها كانت تتمنى المشاركة في أعمال سورية هذا العام لكنها اعتذرت، مضيفة: "اعتذرت عن شغل مع المخرجة كاملة أبو ذكري علشان أشارك في الجزء التاني من مسلسل عروس بيروت، وبتمنى أشتغل معاها قريب".
كما تحدثت عن موقف صعب تعرضت له قائلة: "كنت مجهزة نفسي لمسلسل، وبعد حوالي عشرين يوم لقيت خبر إن التصوير بدأ ومفيش ليّا مشاهد، ولما كلمت المخرج قالي إنه نسي يعتذر وجاب فنانة تانية مكاني".
وأكدت مرام حبها للعمل في مصر قائلة: "مفيش ممثل مش نفسه يشتغل في مصر، الوجود الفني في مصر مهم جدًا لأي فنان".
وعن إمكانية التعاون مع محمد رمضان وأحمد العوضي، قالت: "أوافق أشتغل مع الاتنين، وبحب محمد رمضان جدًا، عمره ما استسلم وعنده ثقة كبيرة في نفسه، وده شيء مميز فيه، هو فنان قوي وحضوره مختلف".
