فارس حميدة ردًا على الهجوم عليه: اتركوا لي حب المشايخ.. وخليكم عالكراسي
كتب: سماح غنيم
كشف المطرب المعتزل فارس حميدة طريقة تعامله مع الهجوم عليه، مؤكدًا أنه لم يعد يرد الشتيمة بالشتيمة، وذلك عبر منشور له على حسابه بموقع فيسبوك.
وكتب فارس حميدة: "السلام عليكم .. قبل ما ربنا يمن عليا وأكون شخص بيجاهد نفسه يكون صالح، كنت برد الكلمة عشرة واللي بيشتمني شتيمة كنت بتفنن في رد الشتيمة دي، وإزاي أكسر بنفسه بشتيمتي له".
وتابع: "لحد ما التزمت وكنت فاكر نفسي خلاص أنا وصلت المجتمع المحترم الملتزم، اللي لا بيشتم ولا بيسب وأخلاق النبي صلى الله عليه وسلم، وكان بالنسبالي أي شخص ملتحي دا حد مش زي باقي البشر".
وأضاف: "إلى أن دخلت مجتمع الملتزمين وإذ بيا أنا أُشتم وأُسب بيا وبعرضي، لمجرد حبي للمشايخ، لمجرد حبي لشيخ أنت مابتحبهوش، لمجرد إني شاب أي حد بيدعو إلى الله، وبيفيد الشباب وبيصلح في المجتمع، لمجرد إن أنا ماشي بمبدأ د كلٌ له ما له وعليه ما عليه".
وواصل: "بيشتموني علشان بحب مشايخي أصحاب الفضل عليا بعد ربنا عز وجل، واللي ما شفتش منهم غير كل إحسان وحرص عليا في أمور ديني ودنياي".
وكتب: "خليكم أنتم في صراعاتكم واقعدوا أنتم على كرسي المحكمة واحكموا مين صح ومين غلط ومين حلو ومين وحش واتركوا لي حب المشايخ وتوقيرهم وصحبتهم لعل منهم مَن يشفع لي يوم القيامة ويأخذ بيدي إلى الجنة".
واختتم: "وجزى الله خيرًا كل من شتمني وخاض في عرضي لأنه، جعلني اكتشف في نفسي فارس اللي ما بيردش الشتيمة بعشرة فارس اللي بيسكت ويكظم غيظه ويصبر ويحتسب جزاكم الله خير".
