الإعلامية حنان البهى تكشف تجربتها مع غسل الموتى: «متعة مافيش بعدها متعة»

كشفت الإعلامية حنان البهي، عن تجربها مع غسل الموتى واتجاهها لذلك التطوع، كنوع من أنواع العمل الصالح، مشيرة إلى أنه "متعة" على حد قولها.

وقالت "البهي": "ربنا يكرمها دكتور منى صلاح هي اللي علمتني الغسل من زمان، وفي البداية كنت متخوفة لحد ما حماتي ألف رحمة ونور عليها قبل ما تموت قالتلي أنتي اللي هتغسليني، وحطتني في الموقف ده وأنا مكنتش عاوزة".

وتابعت: "ومن وقتها وأنا بغسل حتى ناس معرفهمش، في غسل في مستشفى أو مركز، عندنا جروبات وأنا مبقولش لا أبدا، بس فيه فترة جوزي كان منعني".

واستطردت: "غسل الموتى ده متعة مفيش بعدها متعة بتعملي حاجة ربنا طالبها منك، واللي تحت إيدك دي محدش عارف يعملها اللي أنتي بتعمليه، وبتدعي وأنتي متيقنة إن ربنا هيستجيب الدعاء، هعوز إيه أكتر من كدة؟".

واختتمت البهى حديثها قائلة: "إحنا بنعمل ده لله، وفي أحيانا غسل بيخلص تكوني زعلانة إنه خلص، بس ساعات كان يبقى في غسل من أوله لأخره بعيط عشان المتوفاة مثلا طفلة صغيرة أو شابة وماتت في حادثة أو إهمال طبي"، وجاء ذلك خلال استضافتها في برنامج "اسأل مع دعاء" مع الإعلامية دعاء فاروق، المذاع عبر شاشة "النهار".