شذى تهاجم حسن شاكوش: «مش معنى إن في هوجه انحدار تتخيل إنك جامد»

هاجمت المطربة شذى، مطرب المهرجانات حسن شاكوش، بعد حديثه عن أغنية "حاجة مستخبية" للنجم محمد حماقي، واتهام صناعها بسرقتها من أغنية تركية، ردا على أن لحن أغنية "بنت الجيران" مقتبس منها.

وقالت شذى عبر حسابها على "فيسبوك": "لقاء حسن الشاكوش انهارده ده بنسبالي كوميديا سوداء و هبد غير طبيعي"

وأضافت: "كنت بضحك، وعايزه اكسر التليفزيون من كميه الاستفزاز و بالأخص الجزء بتاع الرد إن حماقي أصلا سارق اللحن من اغنيه تركي، وأساسا الأغنيه التركي نازله بعد أغنيه حماقي  بسنتين على الأقل، و إن أغنيه حماقي من 2012 جايبه 16 مليون بس".

وتابعت: "نقف بقا هنا، أولا  لما نجحت أغنية وسارق لحنها طيب كنت من باب العلم بالشئ ثقف نفسك وأعرف تاريخ اللحن ده إيه و مين اللي واخده من مين، تاني حاجه قصدك إيه بأغنيه حماقي جايبه 16 مليون بس إنك اجمد وكده من حماقي، م هو مش معنى إن في هوجه وانحدار في الذوق  تتخيل إنك جامد أوي  وتتكلم بتعالي كإنك مغني  قصيدة الاطلال". 

واستكملت: "والله أمثله بجد تكره الواحد في اليوم اللي فكر يسيب فيه حاجات كتير بيحبها علشان يخبط في العالم دي، ولقب فنان ده يتقال على كل من هب ودب وقا مقياس النجاح وتقدير حجم الموهبه مربوط ب views وحسابات أبعد ما تكون عن  المهنيه و الفن لنا الله والله" .