عايدة رياض عن تصريحها «مسيحية وبضحي»: مش مستاهل كل الضجة دي

علقت الفنانة عايدة رياض، على الجدل الذي أثير عبر السوشيال ميديا، بعد تصريحها الذي أدلت به، والذي قالت فيه "أنا مسيحية وبحتفل بعيد الأضحى".

وكتبت عبر حسابها الرسمي على "فيسبوك": "أنا مسيحية وبحتفل بعيد الأضحى، أنا مش شايفة إن الموضوع كان مستاهل كل الضجة دي إطلاقا.. كوني مسيحية وبشارك في الأضاحي وباكل فتة وبنعيش أجواء العيد مع بعض، ودي حاجة مش بتقلل مني أو حتى بتثير الجدل بالعكس ده شئ محمود جدا".

وتابعت: "الذبح عموما موجود في كل الأديان السماوية وموجود في ديانتنا وبنشترك كلنا وبنضحي وبنتجمع كالعادة وخلي إللي يتكلم يتكلم، وأنا متعودة على كدا من زمان، و عمر ما حد كان بيسأل على ديانة حد إيه، الدين لله والوطن للجميع وكلنا ف الأخر مصريين أخوات وأهل و صحاب وأحبة ومفيش فرق بينا إطلاقا و لما حد كان بيتكلم كلمة مش كويسة عن الإسلام كنت بطلع أرد بنفسي لأننا واحد".

واستكملت: "يا جماعة مفيش فرق بينا لأننا بنتشارك الوطن اللي بيجمعنا على المحبة والود و طول عمرنا ايد واحدة و هنفضل إيد واحدة و يقول غير كدا دول ناس فاضية وأنا مش عايزة أدخل في جدل مع حد من دول.. يارب دايما متجمعين في الخير ودايما أخوات وأهل وصحاب وجيران وحبايب ودايما أيد واحدة، و ربنا يخلينا لبعض ويبعد عننا أي فتنة تفرقنا عن بعض".