لقاء الخميسي تنتقد مهاجمي حارس الاتحاد: الإنسانية راحت فين دي رياضة مش خناقة

 عبرت الفنانة لقاء الخميسي عن غضبها واستيائها الشديد من الإساءة والإيذاء النفسي التي تعرض لهما حارس مرمى الاتحاد السكندري أحمد يحيي، وذلك من قبل جماهير مباراة الاتحاد السكندري وسيراميكا كليوباترا التي أقيمت أمس الخميس، وبسببهما دخل في حالة انهياء وبكاء هستيري.

وكتبت لقاء عبر حسابها الشخصي على موقع التواصل الاجتماعي فيسبوك: "الحقيقة إن الواحد ساكت بقاله سنين بس اللي حصل النهاردة لا يسكت عليه، الأخلاق راحت فين؟! الإنسانية راحت فين؟ إيه بجد اللي حصل للناس، مشهد بائس ومخيف ولا يمت للإنسانية بصلة".

وأضافت: "أحمد يحيى حارس مرمى الاتحاد السكندري.. حارس مرمى مثابر ومجتهد وإنسان خلوق وشاب في بدايات مستقبله، اتوفى أخوه من يومين ونزل الملعب ولعب ووقف وصد وعمل اللي عليه كله والأخطاء ماتخصهوش وحتى لو تخصه ودا مش حاصل ! ليه الاهانات ليه الشتيمة ليه التعدي بألفاظ خارجة ليه كل دا.. يا عالم دي رياضة رياضة مش خناقة ما بين بلطجية، دي متعة مش تعنيف".

وتابعت: "إيه بقى امتى هاتفهم ان لاعب الكرة بني آدم بيؤدي شغله وبيحس وبيحلم وعنده أهل بيزعلوا أما بيتهان وهما يتهانوا معاه، وعنده أم بتزعل وزوجة بتتجرح على جرحه، كفاية بقى كفاية تكرهوا الناس في عيشتهم وشغلهم اللي بيبذلوا فيه مجهود وبيحبوه".

واختتمت "ما حدش ليه حق مطلق في الشتيمة والإهانة.. أي حد بيشتم هل يقبل إنه يتشتم ويتهان، هل تقبل دا عليك وعلى أهل بيتك.. اتقوا الله بقى اتقوا الله".