كواليس إنهاة فتاة حياة خطيبة حبيبها بالبحيرة.. «خنقوها في الذرة.. ولازم يتحرق قلوبهم زي ما حرقوا قلوبنا»

اتشحت قرية صيدناوي التابعة لسيدي غازي بكفر الدوار بمحافظة البحيرة، بالحزن الشديد إثر مقتل فتاة لم يتعدى عمرها 18 عام على يد حبيبة خطيبها بسبب خطوبتها له، وترك المتهمة بعد أن أقام معها علاقة جنسية.

والدة أنغام الضحية قالت: كان عندها ١٨ سنة وكانت بتشتغل في شركة خضار وكان مقري فاتحتها قبل العيد بشهر، هي كانت رايحة شغلها الصبح قابلتها حبيبة خطيبها على السكة وأمها مستنياها في وسط الذرة في الأرض الزراعية مسكوها وشدوها وأخدوها وقالولها تعالي يا أنغام اعمليلنا حاجة وهي راحت على نيتها واخدوها وخنقوها في الذرة هي وأمها اصلها ما تعملش العملة دي لوحدها.. لكن دي في حد مساعدها مفيش واحدة تقدر على كده لوحدها تخنقها وتعمل فيها العمايل اللي هي عاملاها دي، هي خنقتها بالإيشارب اللي كانت لابساه وسابتها مرمية.

وأضافت والدته الضحية، أنها كانت تجرى على لقمة عيشها وتجيب الجنيه بالحلال، انغام عندها ٣ اخوات بنات وكانت بتساعد والدها وبتقوله يا بابا لازم اساعدك عشان احنا ٤ بنات واحنا على قد حالنا ولا بنروحوا عند حد ولا بنيجوا من عند حد.. هي كانت قالتلنا بتحبه وعايزاه كنا سبناه مكانتش تعمل العمايل البشعة دي عايزينها وامها يتشنقوا ونشوفوهم بعنينا.

وتقول اختها داليا: انا طلعت من هنا الشغل الصبح لقيتها قامت من النوم بتقولي انا شوفت حاجة وحشة، انا كنت بكلم خطيبي بالليل وشوفت بومة بيضة واقفة على السور وخوفت وقالي انزلي عشان ما تخافيش يعني ده فال وحش يعني هي كانت حاسة قولتلها خير ما تخافيش وامي راحت لبنت خالتي والدة وسابتها هي وابويا بيفطروا وانا نازلة انا وزميلي شوفت البت دي واقفة تتلفت وابتسمت اما شافتني لان اختي بتعدي بعدي بعشر دقايق ربع ساعة وهي خلتها معدية وسحبتها مش عارفة ازاي في ناس بتقول اختها قالتلها تعالي شوفي اختي وخطيبك بيعملوا ايه في الدرة والمكان اللي دخلت فيه اختي ما تعرفهوش والبت دي ما تعملش العملة دي لوحدها وضاربة اختي على رجلها وعاملة فيها عمايل سودة ومزرقاها وعضاها في دراعها ووشها وادت تليفون اختي لابوها ابوها دارى على الجريمة، ابويا كان بيقول لانغام اقعدي يوم من الشغل تقوله لا وانا وهي كنا بنساعدوا ابويا وبنجروا على اكل عيشنا، احنا ٤ بنات ما عندناش اخوات صبيان بنجروا على اكل عيشنا مع ابويا وبنساعدوا معاه

وتشير شقيقتها الاخرى أن المتهمة بعد ما قتلتها غيرت ملابسها وذهبت الامتحان ونزلت واما قالوا في واحدة مقتولة وراحت وقالت دي انغام بنت عمي رجب سليمان عرفتها ازاي اذا كان اهلي مكانوش عارفينها

وتابعت ابنت عمهم: أن الضحية كانت ملاك مالهاش دعوة بحد، عايزين حق انغام وزي ما شنقتها تتشنق ، حسبنا الله ونعم الوكيل وعايزين حق اختي وعايزين القصاص، عايزينها تتشنق زي ما شنقتها وتتبهدل بهدلتها

وطالبوا بالعدالة وحقها ورئيس الجمهورية نفسه يقف جنبها العين بالعين، احنا بنناشد رئيس الجمهورية، احنا ٤ بنات ومالناش حد غير ربنا ، يجيبوا حق اختي بالله عليك تجيب حق اختي، احنا بنناشد وزير الداخلية دي بنت مصر بحالها.. 

واعترفت المتهمة بقتل جارتها فى البحيرة باستدارج المجنى عليها أنغام. وأثناء سيرهما بالمنطقة إلى طريق فرعى وسط زراعات الذرة في منطقة سيدى غازي في محافظة البحيرة، وقامت بخنقها حتى فارقت الحياة، ثم استولت على هاتفها المحمول ولاذت بالفرار متجهة إلى منزلها.

وقررت نيابة مركز كفر الدوار في محافظة البحيرة حبس المتهمة وخطيب المجني عليها 4 أيام على ذمة التحقيقات، في حادث مقتل فتاة كفر الدوار موجهة إلى المتهمة تهمة القتل، وإلي خطيب المجنى عليها تهمة خطف وهتك عرض المتهمة.

وكشفت تحقيقات نيابة كفر الدوار عن وجود علاقة عاطفية بين المتهمة رحمة .ف والمتهم مصطفى .ف واستغل المتهم صغر سن المتهمة البالغة من العمر 15 سنة، وأقام معها علاقة جنسية، على مدار أكثر من عامين، وطلب منها خلالها الأموال لتدبير احتياجات الزواج حتي بدأ في الابتعاد.

وتوصلت التحقيقات إلى أن المتهمة في حادث مقتل فتاة كفر الدوار حاولت التخلص من حياتها بتناول مبيد حشري إلا أن أهلها قاموا بنقلها إلى المستشفى الجامعي في الإسكندرية، وتلقت العلاج.

وكشفت اعترافات المتهمة أنه عقب تقدم المتهم لخطبة المجني عليها المتوفاة، قررت الانتقام منه في شخص المتوفاة وتربصت لها أثناء ذهابها إلى عملها واستدرجتها إلى الأراضى الزراعية، للمرور من خلالها متعللة بوجود سرادق عزاء على الطريق الرئيسى.

وأضافت المتهمة بعد ان ابتعدت عن أعين المارة حتى باغتت المجني عليها أنغام .ر وقامت بخنقها بقوة، وطرحتها أرضا، وصعدت عليها حتى فارقت الحياة، ثم استولت على هاتفها المحول.

واعترف المتهم في التحقيقات بأنه أقام علاقة جنسية مع المتهمة، ثم تركها بدعوي سوء سمعتها، ثم تقدم لخطبة المجني عليها.

وبعرض أوراق القضية على أحمد وحيد، مدير نيابة مركز كفر الدوار، قرر حبس المتهمة «ر .ف» 4 أيام احتياطيا على ذمة التحقيقات بتهمة قتل المجني عليها وبحبس خطيب المجني عليها 4 أيام احتياطيا بتهمة خطف المتهمة وهتك عرضها.

وقرر مدير نيابة كفر الدوار إعداد مأمورية من قوات الشرطة للانتقال برفقة المتهمة لتمثيل الجريمة وعمل محاكاة لها، وبندب الطب الشرعي لتوقيع الكشف الطبى على المتهمة لبيان صحة واقعة الاعتداء الجنسى عليها.

وأجرت نيابة مركز كفر الدوار التحقيق مع المتهمة بقتل فتاة كفر الدوار بسبب تقدم حبيبها لخطبة المجنى عليها بعد يومين من قراءة فاتحتها على الشاب.

وكان اللواء أحمد خلف، مدير أمن البحيرة، تلقي إخطارا من مأمور مركز شرطة كفر الدوار بعثور الأهالي على جثة فتاة مُلقاة في إحدى الأراضى الزراعية وسط زراعات الذرة نطاق قرية سيدي غازي، بمركز كفر الدوار، وبها سحاجات وخدوش ولم يتم العثور على الموبايل الخاص بها.

وعقب نقل جثمان المجنى عليها إلى ثلاجة حفظ الموتي في مستشفى كفر الدوار العام، قرر مفتش الصحة أن السبب الوفاة إسفكسيا الخنق وتوجد شبهة جنائية في الوفاة، وقررت نيابة مركز كفر الدوار انتداب الطب الشرعي لتشريح الجثة وبيان أسباب الوفاة، وأداة الجريمة، وتكليف المباحث بالتحرى حول الحادث.

وتوصلت التحريات إلى أن المجنى عليها «أنغام. ر» 16 سنة، تقيم في عزبة صيدناوى التابعة لقرية سيدي غازي في مركز كفر الدوار، وأن علاقة عاطفية تربط المتهمة بخطيب المجنى عليها، وبعد علمها بخطبتها، قررت قتلها بعد قراءة فاتحة حبيبها على المجنى عليها، ونفذت ما عزمت عليه.