بعد تصريحات ياسمين عز الأخيرة.. نهاد أبو القمصان: «المذيعة دي حالة لوحدها حد يشوفلها عريس ويخلصنا منها»

ردت المحامية نهاد أبو القمصان، رئيسة المركز المصري لحقوق المرأة، على تصريحات الإعلامية ياسمين عز الأخيرة والتي دافعت فيها عن الرجل وحقوقه ورفضها الكثيرون من قبل مستخدمي السوشيال ميديا، دون التصريح باسمها وبشكل غير مباشر.

وردًا على سؤال المذيعة سارة دندراوي، حول ما صرحت به ياسمين عز من خلال برنامجها حول ترك الرجل يخطو على السجادة لأنه اشتراها بأمواله، قالت أبو القمصان: "الحقيقة المذيعة دي حالة لوحدها، هي إما نفسها تتجوز فعمالة تبعت رسائل على الهواء فحد يشوف لها عريس ويخلصنا منها".

وتابعت: "يا إما أنها بتعمل حاجة كده بتركب بيها التريندات"، وجاء ذلك خلال مداخلة بطريقة "الفيديو كول" عبر برنامج "تفاعلكم" على قناة العربية.

ومن ناحية أخرى، كانت ياسمين عز قد تصدرت تريند مواقع التواصل الاجتماعي، خلال الفترة الماضية، وذلك بعد أن قدمت عددًا من النصائح إلى الزوجات وتحدثت عن زيادة نسبة الخيانة الزوجية في مصر.

وقالت عز عبر برنامجها "كلام الناس": "ليه معظم الستات بتتغير بعد الجواز؟ أعرف ستات لما إجوازهم ينزلوا الشغل ولا بيعبروهم، وكأن لسان حالها يقول له المركب اللي تودي، طبيعي بعد كدة إن الراجل لما يروح الشغل ويلاقي واحدة بتبتسم له يعجب بيها، وترجعوا تسألوا الرجالة عينها زايغة ليه؟.

وتابعت: "الراجل طول ما هو شايف بوز قد كده طول النهار أدامه، أول ما يرجع جوزها للبيت، بدل ما تسأله عملت إيه النهارده، بتبقى قاعدة قمطة دماغها بتقوله إيدي وجعاني والعيال تعبوني ومش قادرة أتكلم".

واستطردت "ليه لما حد ييجي من أهلك الولائم تشتغل والأصناف والأشكال تظهر، وفي الأيام العادية مفيش حاجة بتتعمل للراجل الشقيان اللي طالع عينه"، مستطردة: "فين أيام لما كانت الست تدي لجوزها الجزء الكبير من الفرخة وتاكل بقيتها هي والعيال".

واختتمت ياسمين عز حديثها قائلة: "دايما حسسيه باللمسة بتاعتك في حياته وفي شكله وفي هدومة علشان دايما يكون محتاج ليكِ، مبقيتيش تفتحي دولابه إلا علشان تفتشي في هدومه وتطلعي كام حاجة تعمليها فوط للمطبخ أو تمسحي بيهم البلاط".