محمد عبد المنعم يدعم لاعب المقاصة المعتزل: لسة المشوار طويل
كتب: محمود جودة
حرص محمد عبد المنعم، مدافع فريق الكرة الأول بالنادي الأهلي على دعم لاعب المقاصة الشاب محمد عادل أمو، الذي أعلن اعتزاله كرة القدم بعد فشل انتقاله من المقاصة إلى المصري البورسعيدي أو الإسماعيلي مع رغبته في المشاركة في الدوري الممتاز.
ونشر محمد عبد المنعم عبر استوري انستجرام مع صورة اللاعب: "متخليش حاجة توقفك عن حلمك، موقف زي ده يقويك مش يخليك تاخد قرار غلط، لسة المشوار طويل ومحتاج نفس طويل.. اشتغل واتعب وأكيد ربنا كاتبلك حاجة أحسن بكتير".
وكان لاعب المقاصة محمد عادل أمو قد أعلن، أمس الإثنين، اعتزال كرة القدم، بعد فشل انتقاله إلى ناديي المصري البورسعيدي أو الإسماعيلي على الرغم من توقيعه للفريقين، وذلك لعدم اتمام اتفاقهما معه، وغلق سوق الانتقالات المصري.
وكتب محمد عادل أمو، (23 عاما) منشورا عبر حسابه بموقع فيسبوك معلنا فيه عدم لعب كرة القدم مرة أخرى، بعد فشل انتقاله لأي من فرق الدوري الممتاز، حيث هبط فريقه مصر المقاصة إلى دوري الدرجة الثانية خلال الموسم الماضي.
ونشر محمد عادل أمو على حسابه بموقع "فيسبوك": "فاضل ساعات علي القيد وانا مخلصتش في اي مكان بعد ما مضيت في فرقتين مصري واسماعيلي وكنت بتعامل مع كل الناس بثقه كبيره جداً مضيت للمصري وفضلت منتظرهم يدفعو شيكات النادي ويخلصوني أنا مضيت للمصري قبل كابتن ايهاب ما يمسك الفرقه اول حاجه قولتها لوكيلي بعد كابتن ايهاب ما بقي المدير الفني قولتلو انا مستعد اتنازل عن أي حاجة بس اروح مع كابتن ايهاب اي حد يعرفني يعرف اني بحب كابتن ايهاب جلال جدا جدا وأن كابتن إيهاب اكتر واحد ساعدني في حياتي".
واستكمل: "قعدت أكتر من اسبوعين منتظر المصري يدفع الشيكات لما حسيت ان مبقاش في اهتمام من المسؤلين في المصري كلمت وكيلي قولتلو هروح اي مكان تاني قالي الاسماعيلي عايزك وانا بحب الاسماعيلي جدا جدا وافقت علي طول وقعدت مع البشمهندس يحيي الكومي ومضيت واتفقت علي فلوسي وكانت المشكله فلوس النادي بس عملت كل حاجه ممكن اعملها قالولي هتستني علي فلوسك عشرين يوم قولتلهم مافيش مشكله عادي ادفعو فلوس النادي وخلصوني وانا مش هنختلف علي اي حاجه اللي حضراتكم عايزينه انا هوافق عليه عشان احقق حلم من احلامي والعب في النادي الإسماعيلي".
كما كتب لاعب المقاصة: "أنا حالياً مروحتش نادي كلمت كل أندية الدوري كل الأندية قفلت القائمه بتاعتها ربنا يسامح كل الناس اللي كانت سبب في اللي أنا وصلتلو ده انا قررت ملعبش كوره مره تانيه وبشكر كل الناس اللي حاولت تساعدني وأتمني ميكونش في أي شخص زعلان مني وبشكر كابتن وليد هويدي والنادي بتاعي ربنا معاكو ويوفقكم وان شاء الله تصعدو مره تانية".
واختتم منشوره بقوله: "أنا واثق جدا أن اللي حصلي ده خير وراضي جدا لكن لأسباب شخصية أنا مش هقدر ألعب كورة مرة تانية.. شكراً".
