منى عراقي عن أنباء زواجها: «ايه القرف ده؟».. وفيديو يكشف الحقيقة

على مدار الأيام الماضية تصدرت الإعلامية منى عراقي التريند، بعد تردد أنباء حول زواجها من أيمن رشوان. 

ومازالت «عراقي» حتى الآن متصدرة محركات البحث وسط حالة من الجدل على موقع التواصل الاجتماعي «فيسبوك»، لتخرج الإعلامية عن صمتها وترد برسالة قوية. 

قالت منى عراقي غاضبة: "إيه القرف اللي أنا فيه ده؟ كل دا بيحصلي ليه؟ أيه المهم في قصة ارتباطي ولا جوازي، أنا بقالي أكتر من يومين مش بنام ونفسيتي اتدمرت، كل ده عشان قررت أعلن عن حياتي الشخصية، وأنا مش عايزة أتجوز في السر تاني، خلاص ولادي كبروا أخبي ليه؟ وقالوا لي بلاش ترتبطي في السر، ولادي قالوا لي خلاص دلوقتي مفيش داعي".

وأضافت: ولما حد بيسألني كنت بقوله هتجوز قريب، والسؤال اللي دمر نفسيتي هو مين؟ وأرد في الوقت المناسب هقول لكم، إنت مالك؟ أنا حرة أقول وقت ما أنا عايزة وحرة أقول مين، عشان حياته ماتبظش وحياتي أنا هأعلن في الوقت المناسب".

وتابعت: في فرح سالي، روحت سلمت على أيمن رشوان وميلاد أبي رعد، عشان دول أقرب ناس ليا في الفرح، وقالوا آه يبقى هو أيمن، لقيت الخبر في الجرنال وتفاجأت زيي زيه، وأنا مكنتش متخيلة الموضوع يبقى بالأهمية دي، وبراحتكم، أهروا، شوية وهتلاقوا هراية تانية، وتلاقوا حد يلهيكم".

وأردفت: اللي عرفني الخبر صديقي ميلاد أبي رعد، قالي إلحقي علشان شافوكم بترقصوا في الفرح إنتي وإيمن قالوا إنكم متجوزين، طلعت في فيديو وقُلت مش أيمن وهو صاحبي وأخويا، وهو طلع نفى، تليفوني مش بيبطل رن بقاله 3 أيام، وبيسألوا اتجوزت مين، إنت مالك؟ خلصت القصة".

وأكملت قائلة: "يعني إيه جواز منى عراقي اللي بقالها سنة بعيدة عن الشاشة يبقى التريند الأول عربيًا، وتطلع قناة المفروض إنها محترمة ومهنية تقول مش الكدبة الأولى؟ إيه الهم دا؟ أنا ياما عملت شغل ولا حد عبرني، وياما عملت نجاحات ولا حد سأل فيا، وياما كان عندي أزمات صحية ونفسية ومعنوية ومحدش قالي إنتي فين، ليه خبر جوازي يقلب الدنيا، انتم مالكم؟".

وأنهت مقطع الفيديو قائلة: "أنا مش عايزة أقول هو مين، وكل اللي يهمني أقوله إنه مش أيمن رشوان، وقُلت ده من ساعتها، إيه القصة؟ مين يجي يخلصني من التريند بتاعي ده؟ ولادي تأذوا وحياتهم اتلغبطت والله أعلم بحاله، والقصة تافهة".