«قرار الحجاب من رؤية في المنام».. 9 تصريحات لـ منال عبد اللطيف أثارت الجدل
كتب: نسرين إبراهيم
تصدرت الفنانة منال عبد اللطيف، محركات البحث على «جوجل»، والتريند عبر السوشيال ميديا، عقب لقاء لها مع برنامج «كلام الناس» الذي تقدمه الإعلامية ياسمين عز ، علي قناة «أم بي سي».
وتطرقت منال عبد اللطيف، للعديد من الأمور الفنية والشخصية التي كشفت عنها لأول مرة، وذلك في أول ظهور لها بعد فترة غياب طويلة.
ويرصد «العاصمة» أبرز التصريحات التي أدلت بها خلال حوارها والتي تصدرت بها التريند.
أبرز تصريحات منال عبد اللطيف في «كلام الناس»
- قرار الحجاب مكنش مفاجئ وقعدت سنتين محتارة ومترددة في إن اخد القرار لحد لما جاتلي رؤية في المنام فيما معناها تزودوا فإن خير الزاد التقوى، وقلت توكلت على الله.
- أخبرت زوجي بقرار الحجاب وفي الأول مكنش مصدقني لأني شخصية مزاجية شوية ولكني أكدت له إني اتحجبت وأبلغته إنه يشتري لي ملابس جديدة مناسبة للحجاب وهذا ما حدث.
- قررت ارتداء الحجاب عام 2012، وحينها كانت متعاقدة في 5 أعمال فنية، ومن ضمنهم مسلسل "كيد النسا" مع الفنانة فيفي عبده، كنت أدخل أصور المشهد وأخلصه وأطلع ألبس الإسدال، وكنت مضطرة أصوّر المشاهد دون حجاب، ومكنتش عارفة أعمل إيه، إلى إن جه آخر يوم تصوير لبسته فيه ومقلعتوش تاني.
- عشت قصة مأساوية، لأن كان فيه واحدة فضلت تكلمني على الماسنجر وتقول لي أنت اتحجبتي، قولت لها الحمد لله، قالت لي لا أنتي اتحجبتي لأن أنتي قرعة، قالت لي أنا عرفت أنك كنتي بتصبغي شعرك ووقع وبقيتي قرعة علشان كدا اتحجبتي، وطلبت تكلمني فيديو كول علشان تتأكد وفضلت تكلمني كتير، وتبعت لي رسائل وتقولي يا قرعة.
- كنت رافضة موضوع الجواز ولكن فرح بنتي اتعرفت على حازم واتعرفت على بنته وحبوا بعض، وقال لبنتي أنه عايز يتجوزني وماما رافضة وانا هبقى باباكي وشوفي أوضتك حلوة أوي وهنعيش سوا.
- فرح جت قالتلي يا ماما أنا بحب بابا حازم ونفسي أعيش معاهم في البيت ووافقي عشان خاطري ووافقت ومفيش فرق بين التلت بنات في البيت وانا بشكره وبشكرني لان في بينا احترام ومودة وحب
- كنت أعيش أنا وطليقة زوجي بنفس المنزل، وهي كانت تحتاج للرعاية قبل وفاتها وكانت مش مصرية ومكنتش تعرف حد في مصر ومكنتش حابة ابنتها مريم تبقى لوحدها مع والدتها في الوقت ده، وجيراني كانوا مستغربين أن طليقة زوجي قاعدة معايا في البيت بس أنا مش ببص على المسمى.
- بعد ما توفت والدة مريم بقيت أعتبر التلاتة عندي واحد وبعاملهم نفس المعاملة، وأصبحت مسئولية البنات التلاتة في إيدي أنا، والـ3 بنات بالنسبالي هما كل حاجة في الحياة ولما مريم ابنه جوزي جت تعيش معانا بقى عندي 3 بنات، لأن مامت مريم كانت غاليه عندي أوي الله يرحمها وكنت بحبها جدًا.
- أنا مع إن الست تقوم بكل واجباتها بكل الحب بما فيها الطبخ، وبالحب بتبقى كل حاجة بتمشي كويسة.
