شيرين عبد الوهاب: «أنا زي البمب وكنت بخضع لعلاج نفسي وبقيت كويسة»

تحدثت الفنانة شيرين عبد الوهاب، لأول مرة عن حالتها الصحية بعد خروجها من المستشفى، وعن الفترة التي قضتها بداخله.

وقالت شيرين عبدالوهاب، عبر مداخلة هاتفية لبرنامج «الحكاية» مع الإعلامي عمرو أديب: «أنا زي البمب وحلوة خالص وحد يبقي بيحبه ناس كتير كده وشعوب بتقوم وتعقد وفي وسط مشاكلهم فاكرني، أنا سعيدة بيكم وبدفى بيكم وبحبكم ليا، ربنا ما يحرمنيش منكم».

وأضافت: «أيوه أنا كويسة، لسه بخضع لعلاجي النفسي اللي بخضع له من ساعة ما خلفت مريم وهنا، لكني أنا بقيت كويسة جدا الحمد لله وباين على صوتي».

وتابعت: «أنا ممتنه جدا للناس، عايز أقولهم انتوا تعبتوا فيا وتعبتوا علشاني، وأنا عمري ما هخذلكم أبدا، وبشكر كل الناس، بشكر اللي قال كلمة حلوة واللي قال كلمة وحشة لأنه أكيد مضايق علشاني أو مضايق عليا وأنا بقوله شكرا لقصدك ولاهتمامك إنك افتكرتني حتى لو بكلمة مش كويسة».

وأكدت شيرين أن تجربتها كانت صعبة ولكن استفادت منها، قائلة: «كانت أيام صعبة علشان اتاخدت على خوانة، حاجة استغربتلها اوي، بس لما صحيت تاني يوم في المستشفى، صحيت قعدت على السرير وقلت لنفسي، قلت أنا قاعدة في مكان أمين جدا كل الناس اللي فيه بتحبني وخايفين عليا وأنا بأكل أحسن أكل وبنام أحسن نومة وسط ناس بيحبوني، إيه المانع إن ما استفدتش باللحظة اللي هقضيها هنا، وإن أرتاح شوية وأكون أحسن وأفضل وأنا بقيت كده فعلا بفضل المستشفى، وفعلا الناس كانوا عملولي فحص شامل، وكانوا بيدوني فيتامينات، وكانوا مدعلني وبقيت أحسن وبقيت كويسة جدا».