ياسمين علي بعد تعرضها لحادث سير وحريق: «ما تبصوش لحياة حد من بره»

كشفت المطربة ياسمين علي، عن تعرض منزلها للحريق، بالأمس، بالإضافة إلى تعرضها لحادث سير قبلها بعدة أيام.

ونشرت «ياسمين» عبر حسابها على موقع التواصل الاجتماعي «فيسبوك»، وقالت: «ما بحبش الطاقة السلبية والله بس أعمل إيه طيب.. هاحكيلكم حاجة صغننة.. امبارح الساعه 2 بليل من العادة ببقى قاعدة مع بابا وماما ويحيى بنتفرج على التليفزيون.. قمت عشان أروح أوضتي أنام».

وأضافت: «دخلت الأوضة قعدت دقيقة شامة ريحة بلاستيك محروق، ومش فاهمة الريحة جاية من فين.. فجأة بدون مقدمات وربنا عالم باللي هاقوله (لقيت السقف على وسعه مولع نار كله بمعنى الكلمة، وفجأة النار اتشفطت وبقت مختصرة فالشكل اللي انتوا شايفينه ده، وقفلنا الكهرباء ورشينا ميه) كل ده ف لحظات، أتاري الجار من فوق في مياه بتنزل من عنده على السقف عندنا فعملت ماس في الكهرباء، وحصلت النار اللي شوفتها دي».

واستكملت:" لو ماكنتش دخلت الأوضة في التوقيت اللي روحت فيه الله أعلم كان حصل إيه.. وقبلها بكام يوم كنا لسة عاملين حادثة بالعربية مع عربية نقل كبيرة، ا تنخدعوش بالضحك اللي بضحكه.. كل واحد له فيلم عايشه.. احمدوا ربنا على كل لحظة أمان انتوا عايشينها بدون ترويع وعدم ستر، وما تبصوش لحياة حد أبدًا من برة".