الرئيس السيسي: «الحرب دي مش بتاعتنا والأزمة مش بتاعتنا .. بطلوا هري بقى»

قاطع الرئيس عبد الفتاح السيسي العاملين بالتحالف الوطنى للعمل الأهلي والتنموي، حيث وجه الشكر لجمعيات المجتمع الأهلى العاملة داخل مصر قائلاً :"أوجه التحية والتقدير للجمعيات الأهلية.. ومش اللى جوه التحالف بس.. كل الكيانات التي تعمل في العمل الأهلي.. باسمي واسم المصريين.. اشكركم وإحنا محتاجين هذا الدور".  

تعرض العاصمة نص كلمه الرئيس عبد الفتاح السيسي للعاملين بالجمعيات الأهلية التابعة للتحالف الوطنى للعمل الأهلي والتنموي.

وأضاف الرئيس السيسي، قائلاً :"النهارده لما بتكون مؤسسة مجتمع مدني.. بتقوم بدور الحكومة.. مش بتعمله بنفس الكفاءة والاحتراف وإحنا بنعترف بكده.. عندنا 50 ألف جمعية موجودة في مصر.. وكيانات التحالف نحتاج المزيد من الكيانات الأخرى تنضم.. شوفنا الدور المجمع والمحشود والمنسق والمسيطر عليه.. ونتائجه في العروض السابقة على المستوي الاقتصادي والصحي والمستويات الأخرى الاجتماعي.. الجهد المنسق واضح جدا خلال السنة دي".

وتابع الرئيس السيسي: "لازم نشكر كل المساهمين من فضلكم.. سواء من مصر أو خارج مصر.. نوجه لهم التحية ونشكرهم لأن الكلام بيتم من خلال دعم كل إنسان عنده القدرة ومن جوه الخير من خلال القدرة اللى عنده أن المساعدة تصل للناس.. وبالأرقام اللى اتقالت سواء 10 مليارات .. دي أموال متبرعين.. ربنا سبحانه وتعالي يوجه لكم الخير ومحتاجين زيادة".

ثم وجه الرئيس عبد الفتاح السيسي، الشكر إلى نماذج مستفيدة من مبادرة "التمكين الاقتصادي" للتحالف الوطني للعمل الأهلي الوطني التنموي، قائلا :"لازم اشكركم واحييكم.. ربنا يوفقكم.. وأنا سعيد.. انتوا نماذج ضمن عدد كبير من مصريات ومصريين شغالين في إطار الاستفادة من مبادرة التمكين الاقتصادي".

وأضاف الرئيس"بشكركم علشان النجاح.. وبقتوا مثال ونموذج للناس. اللى زيكم يشتغلوا ويشوفوا الأمل وييقي حاجة تفرحنا وتسعدنا.. وأتمني لكم التفوق وأتمني للجميع التوفيق".

 وأستكمل الرئيس "كنا بنقول عام 2022 إنه عام المجتمع المدني، بس بصراحة ظروف 2023 يمكن تكون محتاجة مننا إحنا نبذل جهد أكتر من 2022، لأن الأزمة اللى بنتكلم عليها أزمة كبيرة ولها تداعيات على العالم كله، ولها تأثير كبير، وبالتالي إذا كانت منظمات المجتمع المدني محتاجة تشتغل وكيان التحالف اشتغل بهمة وضغط كبير خلال 2022 أتصور أن الجهد يحتاج أن يتضاعف هذا الجهد خلال 2023.

أضاف الرئيس"قالتكم  يا دكتور مصطفى هتقدموا 23 مليار جنيه، وأدعو الجميع للمساهمة أكتر، وإحنا من جانبنا كحكومة أو صندوق تحيا مصر وباقى الصناديق نكمل الرقم أكتر من كده.. مش عاوز أقول رقم محدد علشان المساهمين يزودوا والحكومة تبذل جهد معانا في أن إحنا نخلى الحركة وتواجد التنفيذي اللى أنا بهنئكم عليه".

قال الرئيس عبدالفتاح السيسي، إنه على تواصل مستمر ودائم مع منظمات المجتمع المدني، مضيفا: "على اتصال بيكم وبكلم كتير من الكيانات وبنتناقش معاها.. وبسمع زى موضوع التمكين والجمعية اللى بتعملوها.

أضاف الرئيس شايف إنها أفكار جميلة جدا وتتناسب مع ظروف المجتمع، ونحتاج في 2023 لمزيد من الجهد الأهلى لأن الظروف صعبة .. وبتكلم بمنتتهى الصراحة.. وده ومش معناه أن الدولة مش هتقوم بدورها في هذا الموضوع، لكن عاوز أقول إن الظرف صعب جدا.. ولما بشوف حتى الناس لما بتتكلم مش بيخوفوا بعض.. يعني كلام مش متنظم وكلام مش مترتب.. وكلام ناس متعرفش حاجة".

طمأن الرئيس عبد الفتاح السيسي، المواطنين على أوضاع الدولة المصرية وعدم الالتفات للشائعات، قائلًا: "يا جماعة اسمعوا مننا مش علشان إحنا أصدق من غيرنا.. ولكن مدركين لحجم التحدي أكثر من غيرنا، والبيانات والحلول بتبقى مطروحة من الدولة، وبالتالي أي اجتهاد من الآخرين ليس مكروه ولا مرفوض ولكن بيعمل بلبلة ويزعج الناس".

أضاف الرئيس السيسي، في كلمة بالمؤتمر الأول للتحالف الوطني للعمل الأهلي التنموي، أن الظروف الموجودة في العالم تضغط على الأوضاع داخل الدول، وبالتالي هذا يضغط على الناس، متابعا: "لو أنا النهارده خوفتكم النتيجة إيه؟ هل لمصلحتكم.. لأ، هل إحنا مانقدرش كدولة وشعب نصمد قدام أي تحدي ولا إيه؟!".

وأكمل الرئيس السيسي في حديثه للمصريين، قائلا: "لو مصر ظروفها صعبة هنتخلى عنها؟ أنا بكلمكم كلهم.. ولو ظروف مصر صعبة أهل مصر هيتخلوا عنها؟ هو إحنا دخلنا حروب وضيعنا فيها أموال مصر.. ولا إحنا دخلنا مغامرات ضيعنا فيها أموال مصر؟ .. الحرب دي مش بتاعتنا والأزمة مش بتاعتنا.. ولكن مصر بتدفع ثمن زي كل دول العالم.. مختتما حديثه مداعبا المواطنين ضاحكا بالقول: "بطلوا هري بقى".