تارا عماد: «خدت إجازة بعد ثانوي سنتين.. وخلصت الجامعة في 8 سنين»

تحدثت الفنانة تارا عماد، عن بدايتها الفنية، ومجال دراستها، واستعادت ذكرياتها في فترة ما قبل التخرج، وغيرها من الأمور الشخصية.

وقالت تارا، خلال لقاء لها ببرنامج «معكم منى الشاذلي» على قناة cbc، أنها أنهت دراستها الثانوية في عام 2012، ثم جلست لمدة عامين كأجازة من الدراسة، قامت خلالها بالسفر والعمل، قائلة: «أخدت سنتين أجازة كنت بسافر أوروبا باخد ورش تمثيل وغيره وبعمل موديلينج.. كنت بشتغل لحد ما قررت أنا عاوزة أدرس إيه».

وأضافت: «دخلت الجامعة في 2014 فنون تطبيقية 5 سنين.. بس أنا أخدتها في 8 سنين مش عشان أنا فاشلة أو بسقط.. هي كلية خطيرة وحلوة وبجد اتعلّمت حاجات كتير أوي.. بس مشكلتها إنها كانت كلها حاجات عملي وأنا شغلي كان أولوية ومشغولة فيه.. وكنت محتاجة أخلص الجامعة مش عشان حد بيقولي أنا محتاج شهادة أو فارضين عليا شهادة.. فكنت واخداها على مهلي».

وتابعت تارا عماد: «من المواقف الصعبة إني نسيت حضور حفل التخرج الخاص بي، إذ انشغلت بالعمل، وحينما أرسلت  الجامعة إيميل لي بموعد الحفل، لم أراه سوى بعد شهر من إقامته»، مضيفة: «اتوجعت لما ده حصل عشان مامتي كانت مستنية اللقطة دي.. فكلمتها وكنت بعيط.. بس بعدها بكام يوم تجاوزت الأمر ونشرت صورتي بلبس التخرج برضو».