ابنة سامي العدل تعمل على عربة طعام بالشارع في دهب: «فشلت كممثلة ومش هقول لله يا محسنين»

كشفت الفنانة رشا العدل ابنة الفنان الراحل سامي العدل عن افتتاحها مطعمًا متنقلاً في الشارع بمدينة دهب بسيناء، حيث جاء ذلك خلال بث مباشر لها عبر صفحتها الخاصة بموقع "فيس بوك"، موضحة أن السبب الرئيسي لتنفيذها ذلك المشروع هو تجاهل المنتحين والمخرجين لها في الأعمال الفنية.

وأوضحت "رشا" خلال البث قائلة: "أنا فتحت مشروع أكل وهنزل أبيع في الشارع في دهب، لأن أنا سعيت وفشلت كممثلة، المنتجين والمخرجين مش بيطلبوني وأنا مش بلومهم بس مش هستني لما أقول لله يا محسنين".

وتابعت: "أنا نقابية من 20 سنة والنقابة موفرالي ميزات زي كارنيه التأمين الصحي عشان لما أتعب أعرف أدخل مستشفى بسعر مخفض، وأنا عارفة إني لو طلبت من أهلي مش هيتأخروا".



وكانت رشا العدل، قد كتبت عبر حسابها الرسمي على «فيس بوك»: "أنا حابة أقول كلمتين، أنا عارفة إن الأيام اللي جاية هايصدر مني فعل هاتهاجم عليه من بعض الناس وناس تانية هاتدافع عني، ناس احتمال تفتكر اني عايزة اعمل ترند وناس تانية هاتقول أنه حقي وناس تالتة هاتقول ايه الأفلام دي واحتمال اخسر ناس".

وأضافت: "الناس اللي تعرفني بجد هاتكون عارفة إن قراري ده كان بعد وقت طويل قوي من التفكير العميق وخوف من رد الفعل.. إذا كان من العامة أو أصدقائي أو المقربين، بس فيه ساعات كدة لازم الواحد يفكر في نفسه وياخد قرار حاسم علشان يرتاح لأنه لازم يحب شوية.. حبيت اقول الكلمتين دول علشان اعرف النهاردة انام مرتاحة لأني خايفة من بكرة،  توكلت علي الله".

يذكر أن، رشا ليست الأولى التي تعلن عن إنشاء مشروع للطعام بسبب عدم طلبها في الأعمال الفنية حيث سبقها الفنان كريم الحسيني بعد تحويل سيارته إلى مقهى متنقل لعمل المشروبات الساخنة.