زوجة هاني محروس تهاجم أحمد الفايد: زوجي كان بيصرف عليه واعتبره ابنه

استنكرت عفاف جريس، زوجة المنتج ومهندس الصوت هاني محروس، تصريحات المطرب الشاب خالد الفايد الأخيرة، بشأن تعرضه للتهديد من قبل زوجها، بعد اعتزاله الغناء كونه كان ملتزمًا معه بعقد وشرط جزائي ولم تنتهي المدة المحددة بالعقد.

وعلقت عفاف جريس، في منشورا لها على ما تردد عبر حسابها الشخصي بموقع فيس بوك، قائلة: "بما إن الموضوع انتشر وهاني محرج علينا إننا ما نتكلمش، بس أنا مش هقدر لأن الكلام ده كبير ودخل في الديانات".

وقالت عفاف جريس: "خالد الفايد إنت قبل ما تعتزل بنص ساعة كنت عايز عقدك إنت ومامتك وخالك، علشان زعلان من هاني إنه أول مرة يزعقلك علشان بتنزل بوستات هبلة وبيقولك إنت مشروع نجم لازم تاخد بالك من تصرفاتك وفيديوهاتك".

وتابعت عفاف جريس: "هاني محروس ده اللي قعدك في بيته في القاهرة سنتين و24 ساعة قاعد في الاستوديو معاه ومع فنانين مصر كلهم واعتبرك ابنه".

واستكملت عفاف جريس حديثها قائلة: "شهادة حق اتحاسب عليها قدام ربنا، خالد كان عايز العقد علشان يشتغل لوحده ويبعد عن هاني، مش علشان يعتزل خالص ولما هاني قال لمامته أنا عامله ألبوم وصارف عليه يمشي إزاي، لقي الدنيا مقفولة في وشه، وطلع من الاستوديو كتب الكلمتين دول عنده على فيس بوك، وقال مش عايز حاجة من الدنيا، ومش عايز الفن والكلام اللي كتبه اتفهم أنه اعتزل، وفي نص ساعة بقي مصر كلها بتدعيله بالهداية وطبعا دي الحاجة الوحيدة اللي ما يقدرش يعترض عليها".

واختتمت جريس حديثها قائلة: "يعني من الآخر بوست صغير منه حكم على نفسه إنه أنهى طريق لسة ما بدأش فيه أصلا، وإحنا قلنا كعيلة مسيحية كل صحابنا وحبايبنا مسلمين أكيد ربنا كان كاتبله كده وربنا يعوض علينا الفلوس اللي اتصرفت عليه، وهو عيل صغير ويشيل شيلته ونسيناه خالص ولا بنهدده ولا فاكرينه أصلا، هاني محروس ابن أصول مفيش أجدع ولا أرجل ولا أكرم منه والدنيا كلها تشهد بده مش أنا بس".