هالة صدقي: «صور مش مظبوطة بالمايوه خلتني أبطل شغل السينما»

حلت الفنانة هالة صدقي ضيفة ببرنامج "ضيفي مع معتز الدمرداش" عبر قناة الشرق الإخبارية.

وكشفت هالة صدقي، سبب ابتعادها عن العمل بالسينما لسنوات طويلة واستبدالها بالدراما، قائلة: "كان لازم أركّز في السينما أكتر، أنا كنت سباحة وكل الأدوار اللي جيالي مايوهات والمخرجين بيستسهلوا، والمايوه بالنسبة ليا زي البنطلون لابساه وبتمرن بيه ليل نهار، ولما يقولوا هتلبسي مايوه؟ آه إيه المشكلة؟، لقيت كل اللي جايلي بعد كده مايوهات للإثارة وبيصوروني بشكل مش مظبوط فوقفت السينما خالص، فالصور اللي مش مظبوطة بالمايوه خلتني أبطل شغل السينما".

وأضافت: "اللي اكتشفني سينمائيًا حقيقي عاطف الطيب، لأنه حطني في أدوار بعيدة خالص عني، وأول حاجة كان دور غجرية في فيلم قلب الليل، وبعدين فيلم الهروب مع أحمد زكي الله يرحمه، وكان لازم يتخططلي بعد كده هبدأ إزاي، وبسبب قلة الإدارة معرفتش أكلمها".

وأنهت حديثها: "بعد ربنا نور الدمرداش كان له الفضل أنه اكتشفني ودعمني ووقف في ضهري، فالحقيقة الله يرحمه كان ملك الفيديو وكان علامة من علامات الدراما المصرية".