جوري بكر: بنتعب عشان نجيب فلوس.. ازاي ساندويتش الـ برجر بـ 375 جنيهًا؟

عادت الفنانة جوري بكر، لانتقاد الأسعار المرتفعة في الساحل الشمالي، ووجهت رسالة إلى منتقديها.

ونشرت جوري بكر، رسالة عبر حسابها بموقع تبادل الصور والفيديوهات، انستجرام، قالت من خلالها، «الموضوع كبر وكويس إني فتحت عين الناس على حاجات كتير بتحصل، كان بالنسبالي الموضوع مش هزار على فكرة، أنا كنت بتكلم بجد، أنا برضو إنسانة طبيعية زي أي حد، بتعب أنا وجوزي ومتغربين عشان نعيش عيشة كريمة لينا ولأولادنا».

وأضافت جوري، «بنتعب عشان نجيب فلوس، والناس اللي مفكرة أننا بناخد ملايين، أنا أدفع براحتي لكن ليه أحس إني بتسرق، واللي بينتقدني وبتقول إيه يا فنانة ما تدفعي ولو معكيش متروحيش، لأ مش هدفع أنا إزازة مياه بالسعر ده ولا ساندويتش برجر بـ 375 جنيه ولا قهوة وعلى فكره دي مش مياه بس ده أكل وشرب ولبس ارحموا من في الأرض يرحمكم من في السماء».

واستكملت، «فين حماية المستهلك في أسعار بعض الأماكن اللي في الساحل، الناس نفسها تنبسط في ناس تانية عايشة على قفا ناس تانية والهبل كتير».

وانهت رسالتا قائلة، «بلدنا جميلة والأماكن جميلة.. أنا بحب كل مكان في البلد دي، وناس كتير تشهد من اسكندرية، شرم، جونة، غردقة، ساحل، أنا بس بكره الاستغلال، وللأسف معظم اللي حوالينا بقوا وحشين وجشع وطمع وقرف، أنا بقول حقائق وربنا يكون في عون الجميع».