زوجة علي الحجار: بروح معاه في كل حفلاته ومقدرش أسيبه.. وقبل الجواز عاكسني بـ«عارفة»

أكدت هدى زوجة المطرب علي الحجار أنها دائمة التواجد في حفلاته، بقولها: "طبعا موجودة ومقدرش أسيبه، وأنا زي الجمهور أحب استمتع بغناه، مضيفة: "أنا باجي زي الناس، لأن دي المتعة بتاعتي، وبعدين عشان أنا مراته بقى وأقف جنبه وأشوف عايز حاجة كل شوية".

وأضافت زوجة الحجار على هامش حفلته بالأمس أنها تحب كل أغانيه، ولكن هناك أغاني مميزة تحب أن تسمعها، منها؛ (عارفة) وعاكسني بيها في البداية، و(أنتي طلعتيلي منين) عشان غناها لي لكنه قدمها من قبل وشعر أنها لم تاخذ حقها فقام بتجديدها وغناها لي، وأغنية (بطلة حكايتي)".

وعن كواليس لقائها بالمطرب علي الحجار، قالت: "كنا صحاب في البداية وهو كان صديق زوج صاحبتي، وحصل تواصل بينا في أول مرة شوفنا بعض، ومكنش حب من أول نظرة، احنا قعدنا صحاب لمدة سنة تقريبا، صحاب بس، وحصل الزواج بعد سنة من تعارفنا".

وأما عن مدى قلقها من الارتباط من الحجار بالرغم من تعدد تجاربه، قالت إنها لم تخشى من ذلك، فلقد عرفته وهو منفصل، واتخذ قرار بالعزوف عن الزواج، مشيرة: "قبل ما نتجوز فضلنا صحاب فترة، وعرفته على حقيقته، هو مش عشان ارتبط كتير يبقى مزواج".

واختتمت: "لا هو شخص طبيعي حظه مش حلو زيه زي أي شخص في الدنيا، وهو كشخصية مفهوش عيوب تخليني أخاف منه، وسنوات زواجنا العشرين تثبت صوابي"، وجاء ذلك خلال لقائها مع الإعلامية سهير جودة عبر صفحتها على "فيس بوك".