«حفيدها بيجرجرها لـ التيك توك».. أبرز تصريحات ميمي جمال مع منى الشاذلي

استطاعت ميمي جمال أن تخطف أنظار جمهورها ومتابعيها، بعد تصريحاتها التي كشفتها لأول مرة عن حياتها الشخصية والعملية، وذلك خلال لقائها في برنامج «معكم» الذي تقدمه منى الشاذلي عبر قناة  Cbc.

ونرصد في السطور التالية، أبرز تصريحات ميمي جمال خلال لقائها في برنامج معكم:-

- بعمل الأدوار اللى تليق عليا وأنا راضية عن نفسي، والحمد لله كل الأدوار كان فيها توفيق من عند ربنا، وعملت اللى أقدر عليه.

- مريت بمراحل كتير صعبة من صغرى فمثلا وقت وفاة والدى كان عندى 5 سنوات، واشتغلت وأنا صغيرة في التمثيل عشان اساعد مادياً لان والدتى وجدتى يونانيات وستات بيوت بس، والحمد لله مرحلة وعدت واشتغلت فيها كويس.

- والدتى كان اسمها ستيلا، وهى وجدتى ربتنى أنا وأخويا وكمان والدتى هي اللى ربت أولادى، ولما كنت بعمل أدوار صغيرة، طلعت معايا في فيلم عدو المراة، كنت عاملة دور مع نادية لطفى وكان المفروض بنعمل ندوة، فطلبوا منها تقعد في الندوة.

- والدتى كانت رافضة زواجي من حسن مصطفى عشان كان أكبر منى بـ 14 سنة، وكان أصلا متجوز قبل كده وكان عنده بنت اسمها سمية.

- أصريت على الزواج من حسن مصطفى لأنى ارتحت له جدًا، ولأن والدي توفى وأنا صغيرة ومحستش بالأبوة والحضن الدافي، وقلت لأمي وقتها أنا مش عاوزة رجل غنى ولا منتج عشان ينتج أفلام زى بعض الزميلات، أنا ببص لراحتى وحسن مصطفى قدر يعمل ده.

- حسن مصطفى كان زوج كويس جدا وافتكر موقف يوم فرح نورا بنتنا، وأنا عارفة أنه جامد، بس وقت ما نورا وهى عروسة بدأت تمشى هي والعريس ببص عليه اشوفه فين لقيته واقف على جنب وبيعيط، وحسيت قد إيه هو طفل كبير.

- بعد وفاة زوجى الفنان حسن مصطفى، قعدت فترة مكنتش قادرة اشتغل قعدت 6 سنين في البيت، لأننا عيشنا مع بعض عمر طويل أكتر من 40 سنة، فكان الموضوع صعب جدا.

- لقيت بناتى الاتنين اتجوزوا وبقيت لوحدى في البيت، فقلت اللى بحب اعمله هو التمثيل فرجعت للتمثيل وبقيت بعمل الشغل برواقة وإحساس.

- وعن اختفائها عن الأعمال الفنية، كشفت ميمي: «غياب 6 سنين بقى في ناس كتير معرفهمش ومخرجين جداد مش عارفاهم،  وعشان أدخل واتعامل معاهم لازم أكون سلسلة وأكون أم للشباب الصغير، ولازم يكون في محبة ياما مش هينفع اشتغل».

- وعن محاولة أحد الفتيات خطف زوجها، قالت: «لقينا واحدة تانية بتحاول تعمل حركات على حسن مصطفى، وفى مرة جت من ضهره وهو بيعمل مكياج وحطت ايدها على كتفه وقالتله شوفت انا عاملة حروف اسمك على ضوافرى ازاى، وطبعا هو انبهر».

وعن رد فعلها، قالت ميمي: «الصراحة كنت زعلانة ومتغاظة ولما رجع واجهته وقلتله وصلت المدام وهو من النوع اللى مش بيعترف ويحب ياكلك بالكلام، ووقتها قلتله أنا جاية عشان أقولك عيب واحنا مش صغيرين، والمركب مش هتغرق عشان احنا مخلفين ولاد وأنا ست عاقلة ومش هتكلم وياريت تحطه في دماغك وميتكررش».

- وعن علاقتها بالتيك توك، قالت ميمي: «حفيدى أدهم غاوي تيك توك وهو اللى جرجرنى له، وكل لما أروحلهم البيت يقولى يلا نعمل تيك توك».