جمال شعبان: الضربة الساقطة في القلب تفصل الإنسان عن الحياة جزء من الثانية
كتب: رحاب جمعة
حدد الدكتور جمال شعبان، العميد السابق لمعهد القلب القومي، أعراض الضربة الساقطة أو ما يطلق عليه سحبة القلب أو الشعور بضربة قوية في القلب، وقال أنها يمكن أن تحدث آلاف المرات في اليوم.
وأضاف الدكتور جمال شعبان، من خلال منشور على صفحته الرسمية على الفيسبوك أن أعراض الضربة الساقطة هي عند شعور الشخص بضربة في صدره، أو انسحاب في روحه أو إنقلاب في معدته.
وعن كيفية حدوثها قال: "لما البؤرة الكهربية الشاردة اللي برا الدايرة الكهربية الطبيعية الربانية بتيجي بدري عن موعدها كأنها مبتسرة زي الطفل اللي بيتولد بدري بيسموها premature الضربة الطبيعية بتسقط ما بتجيش في موعدها لأن القلب بيعتبر نفسه قام بضربتين بمجهود زيادة فبيرتاح جزء من الثانية دي الشخص بيحطها سحبة روح أو توقف في التنفس أو كأنه انفصل من الحياة لوهلة".
وأضاف، قائلاً : "الضربة الساقطة ممكن تكون من البطين وممكن تكون من الاذين، ولكن الضربة الساقطة من البطين هي الأهم وخاصة لو المعدل بتاعها متزايد يعني بالآلاف في اليوم لأن القلب في اليوم بيشتغل 100 ألف مرة".
وعن تشخيصات المرض يقول: "هناك متخصصين ممكن يشخصوا حالتك على أنها حالة نفسية، علشان كده ساعات بنحتاج نعمل رسم قلب مستمر 24 ساعة أو 48 ساعة أو حتى أسبوع بجهاز ( الهولتر) علشان نعرف عددها ونسبتها وخاصة لو ما ظهرتش في رسم القلب العادي لما تكون النسبة أكثر من 10 ٪
ممكن تعمل اعتلال في عضلة القلب PVC cardiomyopathy".
وتابع شعبان قائلاً: "ساعات بنحتاج نعمل رنين مغناطيسي علشان نتأكد إذا كنا هنركب جهاز صدمات وإلا نعمل عملية كي..الأدوية ممكن تفيد في حالات كتير لكن الكي بموجات الراديو مع الجهاز ثلاثي الأبعاد ممكن تبقي حل نهائي".
