فيدرا منتقده مصلي السيدات في المساجد: «ليه دايمًا بيكون صغير ومكتوم؟» (فيديو)
كتب: شاهيناز خليفة
تحدثت الفنانة فيدرا، لأول مرة عن مصلى السيدات بالمساجد والذي دومًا ما يكون ضيق، مشيرة إلى أن بهذه الطريقة تشعرن السيدات كأنهن مواطنات من الدرجة الثانية.
وقالت فيدرا، خلال فيديو نشرته عبر صفحتها الرسمية على موقع الصور والفيديوهات الشهير إنستجرام: «أنا عندي سؤال.. احنا طبعا عارفين إن في الجامع الستات بتصلي بعيد عن الرجالة وبنبقى منفصلين، بس هو السؤال اللي أنا مش لاقية ليه أي رد.. هو ليه دايما المصلى بتاع الستات صغير ومكتوم ومقفل بحواجز ومدخله جانبي كده زي ما يكون مثلا مدخل باب المطبخ».
وأضافت: «احنا ليه بنتعامل كدة؟ احنا ليه بنتعامل معاملة المواطن الدرجة التانية؟ يعني ليه المصلى بتاعنا ميبقاش يشرح؟ ليه المصلى بتاعنا ميبقاش مدخله حلو وجميل».
وتابعت: «زي مدخل مصلى الرجالة؟ ليه ده مش متحقق للست؟ ليه أنا كمسلمة داخلة أصلي أتعامل معاملة مواطن درجة تانية؟».
واستكملت حديثها: «تلاقي الرجالة عندهم براح مرعب، في رجالة أكتر بتروح تصلي صلاة الجمعة وكل الكلام ده احنا عارفينه بس اعملولنا حاجة أصغر أو أقل لكن إعملوها حلوة، إعملوا مدخلها محترم وحلو مش مدخل كدا على جنب كأنهم ناس مش مهمة داخلة تصلي.. الست دي كائن مش مهم تدخل بقى من مدخل جانبي كده.. ليه مش فاهمة؟»,
وأختتمت حديثها، قائلة: «إعملوا حساب للستات شوية مش هيجرى حاجة لو عملتوا حاجة حلوة للستات وهي رايحة تصلي».
وفي سياق مختلف، تشارك الفنانة فيدرا في فيلم «العميل صفر»، والفيلم بطولة أكرم حسني، لبلبة، بيومي فؤاد، أسماء أبو اليزيد، ليلى عز العرب، ونخبة من نجوم الفن، من تأليف وائل عبدالله، ومن إخراج كريم العدل، ومن المقرر عرض الفيلم يوم 16 أغسطس المقبل بدور العرض السينمائية.
اقرأ أيضًا: آخرهن نادية الجندي.. نجمات خطفن الأنظار برقصهن على «السوشيال ميديا»
View this post on Instagram
