محمد الحلو عن أغنيته لـ السعودية: «كلمت مصطفى كامل وهو بيفهم في الحاجات دي وعملنا الأغنية»

عبر المطرب المصري محمد الحلو، عن سعادته بمشاركته في حفل ليلة الطرب الأصيل، التي أقيمت أمس، بمدينة جدة بالمملكة العربية السعودية.

وأشار "الحلو"، خلال المؤتمر الصحفي، الذي أقيم على هامش الحفل، قائلاً :"صراحة قولت ممكن يتعاد الحفل في موسم الرياض إنما فوجئت على السوشيال ميديا بصفحة الوزير وقال إننا مكتفناش بصوته ونعمله حفلة يوم 1 سبتمبر، استغرب والله وقولت ممكن بقى عايز يهديني ويحيني".

وأضاف، قائلاً :"لما غنيت ليالي الحلمية لقيت صريخ، بقى قلبي فرحان، زائد الكرم الكبير اللي أنا شوفته فأنا ماشي من هنا في دماغي هقدم إيه؟ فقولت مفيش غير صوتي أقدم بيه غنوة يبقى هدية من هدايا اللي ادوهاني الجمهور والمملكة".

واستكمل، قائلاً :"كلمت مصطفى كامل ومصطفى بيفهم في الحاجات دي وهو شاف الحفلة وعملي الكلام ولحنه وادينا الأغنية للموزع أمير عبد المجيد هو كان عنده شغل ولكن أنا حبيب عمره ودي السعودية وهو كمان سعودي مصري، فعملناها وطلعت بالشكل ده الحمد لله، بعد ما اتناقشنا في شوية تفاصيل ومعظم الأغنية طلعت من أول مرة".

وعن رد فعل الجمهور تجاه الأغنية، قائلاً :"لا أنا متفاجئتش أنا اتخضيت، مكنتش متوقع كده أبدًا ودي أول مرة تحصل، مبقيتش عارف اعمل إيه وباصص لأمير مش عارف هو كمان يعمل إيه وكان شرف كبير جدًا على رأسي إنه يكلمني على المسرح أبو ناصر قدام العالم العربي وهو وزير، أنا آه كبير في السن إنما ده شرف أكبر مني".