بسمة وهبة: الفيديو بتاعي بالعبري عمل قلق وتوتر لـ نتنياهو وكسر عزيمته

عبرت الإعلامية بسمة وهبة عن استيائها الشديد من تحريف الفيديو الخاص بها الذي وجهت من خلاله رسالة لإسرائيل باللغة العبرية، مشيرة إلى أن هناك لجان إلكترونية إسرائيلية حرفته بالذكاء الاصطناعي.

وقالت "وهبة": "دي كانت رسالتي للشعب الإسرائيلي ومعروف مغزاها إيه، سيبكوا من العبري المكسر بتاعي، واضح إن الفيديو بتاعي عمل تأثير في إسرائيل وكنت بقول للشعب الإسرائيلي إن رئيسكم مش مهتم بيكم".

وتابعت: "واضح إن في انقسام جوة الجيش الإسرائيلي خلى نتنياهو متوتر إن مذيعة مصرية عملت فيديو يتيم باللغة العبرية المكسرة بس المذيعة دي كسرت عزيمتك ووترتك وقلقتك سبحان الله يوضع سره في أضعف خلقه، حاولت إني أعمل حاجة أفيد بيها فلسطين".

واستعرضت بسمة وهبة الفيديو المفبرك لها وقالت: "هل أنا الشخصية اللي في الشاشة دي؟! يرضيكم كده؟! عاوزة أستحلفكم بالله، هل دي لغتي؟! مش أنا بتكلم عِبري مكسر ومش عاجبكم، حد شاف بقي؟! دا مش بقي، لكنه صوتي المفبرك بتقنيات الذكاء الاصطناعي"، وجاء ذلك خلال حلقتها الليلة من برنامجها "90 دقيقة".

إقرأ أيضًا: 

نزار الفارس يكشف «فبركة» خلاف بسمة وهبة وفيفي عبده على الهواء


وكانت، الإعلامية بسمة وهبة، قد ردت مؤخرًا على الانتقادات التي تعرضت لها بسبب الرسالة التي وجهتها بالعبري للجيش الإسرائيلي في برنامجها "90 دقيقة"، الذي يعرض عبر قناة "المحور".

وقالت "وهبة": "في ناس مش عاجبها لغتي في العبري، أنا قلت النهارده ريح الزبون، أنا قررت أتكلم بالعربي عشان محدش يضايق، وهجيب حد يترجم الكلام بالعبري".

وأضافت: "أنتوا حساسين أوي من حتة بتاعة طلاقة اللسان في العبري، لو إنجليزي أو فرنساوي نص نص ماشي، إنما العبري، لأ، لازم اللي يتكلم عبري يكون بيتقنه، وتكون راحت عاشت في إسرائيل شوية فأتقنت العبري!" أو عملت فيلم قعدت ست أشهر زي مهمة في تل أبيب تتعلم العبري زي الفنانين الجمال ما علموا، لما تكون في وسط مذبحة فيها أخوننا وأسرنا وأهلنا الفلسطينيين وكلمتين عاوزين يتقالوا بالعبري قررت أقولهم وأنا في العربية وتحسب لي هذه المحاولة.

وتابعت: "الغريب أني لما فتحت أكونتات الناس اللي بتهاجمني لاقيتها أكونتات فيك معمولة إذا دي حملة ممنهجة من مين وليه مش فارق معايا، بس الأهم إن الرسالة بتاعتي وصلت لإسرائيل واللي مش عاجبه يعمل زي واللي غيران مننا يعمل زينا".

واختتمت بسمة وهبة حديثها قائلة: "والله ما ندمت لحظة إني عملت كده، والناس اللي بتتريق في منتهى السخافة ولا تسوى شيء لأنهم سابوا الحدث والموضوع وقعدوا يركزوا في حاجة مالهاش علاقة بالمشكلة والحدث اللي إحنا فيه، وأنا هعمل شغلي وأنجح أكتر وهستمر اكتر بإذن الله تعالي".