دعاء فاروق تطالب بمقاطعة البضائع الأجنبية.. وهذا طلبها من رجال الأعمال

أعلنت الإعلامية دعاء فاروق تضامنها مع حملة المقاطعة للمنتجات التي تدعم دولة إسرائيل في حربها على غزة، خلال الأسابيع الماضية.

وقالت دعاء فاروق، خلال فيديو لها قامت ببثه عبر موقع تبادل الصور والفيديوهات، انستجرام:"من امبارح في حملة نازلة ضد المقاطعة نازلة في كل مكان، وأن المقاطعة دي بتئذي المصريين وبتلغي الاستثمار في مصر، وأنا اتخضيت من قلة الوعي شوية اللي عند بعض الناس، وأتمنى الناس تقبل الرأي الآخر اللي بيدعم وبيقوي فكرة المقاطعة، والفرانشايز ده قوانينه معروفة في العالم كله، وهما مش بيدوك الاسم وخلاص جه بيديك خامات وعمالة وفي المقابل لازم ياخدوا فلوس".

واستكملت:"طول ما أنت واخد العلامة التجارية يبقى هتطلع نسبة من أرباحك للشركة الأم، يعني حتى لو أي ماركة فاتحة في مصر بناس مصريين بيروح نسبة من الأرباح للشركة الأم اللي بيملكها ناس يهود وبيكونوا بنسبة كبيرة صهاينة وبيدعموا جيش اللي ما يتسموا، دي حاجة لا تخفى عن الجميع، والمقاطعة أثرت فيهم وإحنا بنخاطب كل العرب مش المصريين بس، لأنهم بيدفعوا ضرايب وبيدعموا الجيش الصهيوني".

وأوضحت دعاء فاروق قائلة:"المنتجات المحلية تعبت علشان تكبر وبتحاول ولكن في اللي كابس على نفسهم، والمنتجات الأجنبية بتيجي هنا بتغط على العمالة المصرية ومبيدوش ليهم حاجة، وطبعًا رجل الأعمال كسبان وهو قاعد في بيته، ولو بنيجي للناس بتوع الصناعة المصرية بيتشتموا، في توجيه للرأي العام وأنا ممكن أروح في داهية بالكلام ده ولكني هقول اللي يخلص ذمتي، فيه عمال كتيرفي المصانع المصرية مش عارفين ياخدوا نسبة من المبيعات، لأن المصانع والشركات الأجنبية مسيطرة وواخدة السوق المصري كله لحسابها، ولما يكون المناخ الاستثماري مفتوح لحبايبنا السعوديين والإمارتيين والكويتيين، هو حد مانع أنهم يجوا يستثمروا؟ هو لازم يهود؟ هو إحنا عندنا رجال الأعمال قليلين؟ ما تشتروا الاسم وتغيروا العلامة التجارية، ما أنتوا تقدروا تعملوا كده ولا لازم نضحي بالعامل الصغير، ما تدعموا القضية بجد".