«روحه طلعت قدام عيني».. شريف منير يكشف كواليس اللحظات الأخيرة في حياة الفنان طارق عبد العزيز

كشف الفنان شريف منير، كواليس اللحظات الأخيرة في حياة الفنان طارق عبدالعزيز، بعد تعرضه لأزمة قلبية أثناء تصوير مسلسل "وبقينا اتنين".

وقال "منير": "كان عندنا تصوير النهاردة في فيلا بأكتوبر الساعة 11 الصبح وطارق كان بيلعب شخصية شريف وكان موجود وكان في حالة تألق كبيرة ونفسية جيدة ونشيط وبيضحك وكل حاجة كانت ماشية بشكل طبيعي".

وأضاف: "في مشهد أنا بعمله هو وممثلة شابة بتيجي ترن جرس وهو بيفتح الباب وأنا بدخلهم الكادر وهو في وسطنا وبيسبنا وبيخرج وعملنا بروفة وصورنا أول مرة الشوت وكان واقف جنبي والمخرج قال عاوزين نعمله مرة تانية".

وتابع: "والمخرج بيقول أكشن جه طارق ناحيتي وشوفت لونه بيروح وسند عليا وأعد على كرسي وسند دماغه على واحد واقف قصادي وقالي مش قادر أقف على رجلي وجسمه أصفر وفجأة أبيض وجسمه سقع وحاولت أدلكله قلبه ولقيت عينه مرفوعة لفوق وفتحتله القميص وجيت اسمع ضربات قلبه مسمعتش حاجة".

واستطرد: "قمنا بنقله للمستشفى ولما رحنا الدكاترة قالولنا أنه جه المستشفى متوفي وأنا شفته وهو روحه بتطلع".

واختتم شريف منير حديثه قائلًا: "كان دايما بيقول انا فرحان بالشخصية دي جدا والخبر نزل عليا كالصاعقة وحسيت بعدها أن الدنيا متستاهلش حاجة"، وجاء ذلك خلال مداخلة هاتفية مع الإعلامي عمرو أديب في برنامج "الحكاية".

وتوفى طارق عبد العزيز بعد تعرضه لأزمة قلبية، عن عمر يناهز 55 عاما أثناء تصوير مسلسل "وبقينا اتنين".

ومن المقرر تشييع جثمان الفنان الراحل ظهر اليوم الإثنين من مسجد الشرطة في الشيخ زايد.

إقرأ أيضًا: 

ريهام حجاج ناعية طارق عبد العزيز: «خبر صادم كنت أطيب الناس»