أحمد جوهر: مبقاش عندنا حماس البدايات بسبب الخوف.. ويوجد انهيار في الذوق العام

تحدث المطرب أحمد جوهر، عن سبب غيابه عن الساحة الفنية طوال الفترة الماضية، معربًا عن استيائه من انيهار الذوق العام على حد قوله.

وقال «جوهر» في حواره مع الإعلامية إنجي هشام، في برنامج «المنسي»، المذاع عبر شاشة قناة «هي»: «كل جيلي له ظروف كده، وصناعة الموسيقى والغناء وقتها كانت عبارة عن كاسيت والشرايط، وده المنفذ الوحيد لأي فنان، وكانت الأستوديوهات والتلحين والإنتاج غني جدًا، وكانت فرصتنا حلوة في الفترة دي واتعودنا نعمل ألبومات حوالي من 8 لـ 16 غنوة، ومش عارفين أنهي غنوة فيهم اللي معاها الحظ وهتنجح».

وأضاف: «احنا مش بُعاد، احنا حابين نبقى موجودين، حتى اللي موجودين بيقولوا الأغاني القديمة مفيش جديد، وأنا دلوقتي علشان أنتج أغنية سينجل بيبقى المخاطرة فيها صعبة، ومفيش الحماس اللي بدأنا بيه، لأن زمان النجاح كان غني جدًا».

وتابع: «عدم الحماس خوف من عدم المواكبة، واحنا مش ضد الجيل الجديد، ولما طلعنا جداد كان علينا معارك، والشكل دلوقتي اختلف بشكل أن الكلمة مش حلوة، والموسيقى في مصر اختلفت جدًا، عكس الموسيقى العربية، وأنا شايف انهيار في الذوق العام شوية».

برنامج «المنسي»، من تقديم الإعلامية إنجي هشام على شاشة «هي»، ويُعرض يومي الخميس والجمعة من كل أسبوع في تمام الـ11 مساءً، ويحل عدد من نجوم الفن ضيوفًا على البرنامج، للحديث عن بداياتهم وتفاصيل مشوارهم والتحديات التي واجهتهم على مدار مشوارهم الفني.

اقرأ أيضا: أحمد جوهر: أغلبية النجوم معندهمش عاطفة.. «هم صح وانا ندمان إني مش زيهم»