إنجي شرف: الفنانة اللي تلبس حجاب وتعتزل وترجع تاني مهزوزة نفسيًا
كتب: مؤمن نصر
علقت الفنانة المعتزلة إنجي شرف، على انتقادات اعتزالها الفن، بجانب الكشف عن رأيها في تحريم الفن وارتداء الفنانات الحجاب واعتزالهن الفن وعودتهن مرة أخرى بعد خلع الحجاب، ودور نقابة المهن التمثيلية في تشغيل الفنانيين.
وقالت إنجي شرف، في لقائها مع الإعلامية إنجي هشام، في برنامج "المنسي"، المذاع عبر شاشة قناة "هي": أتقال إني اعتزلت الفن علشان هتجوز أو علشان الفن حرام، وأنا بتضايق من الكلام ده، الفن رسالة وهو مراية المجتمع وثقافة، وأنت تقدم حاجة حرام أو لأ دي بتاعتك، ولكن أنا عمري ما أقول كده على الفن ولا على زملائي وأنا وعيت على الدنيا لقيت نفسي ممثلة".
وتابعت: "اللي بتعتزل وتلبس الحجاب وترجع تقلعه وترجع للفن بتبقى مهزوزة نفسيًا، أو بتبقى في قصة حب وحد ضاغط عليها علشان تعتزل، وكل واحد مسئول عن تصرفاته بدليل أنهم بيرجعوا تاني، وممكن يكون حد مر بتجربة صعبة وفي الآخر إحنا بشر خطائين".
وأضافت: "دكتور أشرف زكي تواصل معايا لما أعلنت قرار اعتزالي، وقالي هو ده قرار فجأة ولا فكرتي؟ قالي طيب هقعد معاكي ونتكلم ولكن متقابلناش".
أما عن دور نقابة المهن التمثيلية في تشغيل الفنانيين، فعلقت إنجي: "للأسف النقابة مبتجبش شغل للفنانيين، وناس كتير جدًا جالها إكتئاب وظروفهم المادية مش أحسن حاجة ومش عارفين يصرفوا على ولادهم، وكان بيوت كتير أوي مفتوحة زمان ودلوقتي ناس بتقعد بالـ 5 سنين في البيت حتى المؤلفين والمخرجين والناس متضايقة، لازم النقابات تدعم الناس دي ومينفعش يكون اللي بيمثلوا 15 أو 20 حد والباقي قاعد في البيت، المفروض أن الدولة معترفة بيا أني ممثلة أنا قاعدة في البيت ليه؟".
وأردفت: "أنا عندي بيزنس تاني علشان مش عايزة أشتغل حاجة مبقاش مقتنعة بيها، وأنا واخدة الفن هواية ومش عايزة أبقى بشتغل علشان الفلوس، والمفروض النقابة يكون في بينهم تعاون وبين المخرجين والمنتجين الجداد، في ناس كتير كبار قاعدين في البيت ومبيعرفوش يعملوا حاجة غير التمثيل، أتمنى يكون في مراعاة للنقابة".
كما تحدثت عن قرار اعتزالها للفن، مؤكدة أن الأعمال التي عُرضت عليها قبل اعتزالها كانت أقل إمكانياتها الفنية، بجانب عدم قدرتها على التأقلم مع المنتجيين الحاليين.
واستطردت: "بقالي سنة بفكر في الاعتزال، وعلشان أكون صريحة كانت لحظة إكتئاب وإحباط في أني مؤخرًا مش بعمل كل اللي عايزاه، والأدوار اللي بتجيلي بنتقي منها وحاسة أنها أقل من إمكانياتي، ده مش غرور مني ولكن أنا وقفت مع نجوم كبار جدًا وكنت من أصغر الناس اللي عملت بطولات".
واستكملت: "مش عارفة ليه الحظ كده ويمكن علشان الإنتاج قل شوية، والفكرة مش في مساحة الأدوار ولكن العمل كـ كل مبيببقاش أحسن حاجة بالنسبة ليا، وبنلاقي نفسنا اللي بينتج حد تاجر وبيبقى شغال في أي حاجة زي أنه بيكون مقاول مثلًا وقرر أنه ينتج علشان شايف أن الإنتاج هيجيب له فلوس، بالتالي الشغل والورق والتصوير بيكون دون المستوى".
وأردفت: "أنا اشتغلت مع ناس جامدة أوي ومش عارفة أتعامل مع اللي بيحصل، وحاسة أن الناس اللي بتنتج دي واخدين المهنة كتجارة ويلا هنخلص 15 حلقة في 9 أيام واقلب، وحسيت أن ده بيضيع اللي عملته ودي حاجات قليلة على إمكانياتي، وقولت أني أعيد حساباتي، وخدت قرار اعتزال التمثيل، ولكن ممكن أطلع في البرامج أو أغني أو أقدم برنامج".
واختتمت حديثها قائلة: "أبقى كدابة لو قولت موحشنيش التمثيل، ولكن أنا خدت القرار في لحظة إحباط، وإيه اللي هيحصل بعد كده الله أعلم، واتضايقت أن الناس قالت إني أعلنت اعتزالي علشان أطلع تريند، والحقيقة أني صليت الفجر وكنت محبطة جدًا ودعيت ربنا وحسيت أني عايزة أبعد عن كل حاجة وكتبت البوست بعد الفجر، وأنا لاقيت الدنيا مقلوبة ومكنتش أقصد ده".
اقرأ أيضاً: إنجي شرف تكشف سبب اعتزالها الفن: «طول عمري مضحوك عليا»
