راندا البحيري تستغيث: فيه شخص من 13 سنة بيحاول يقف في رزقي وأكل عيشي

تحدثت الفنانة راندا البحيري عن شخص يحاول دائما إذاءها في عملها كفنانة وممثلة، وعلقت على هذا الأمر عبر حسابها الشخصي على الفيسبوك قائلة: شخص من ١٣ سنة وهو بيحاول يقف في رزقي وأكل عيشي، اتصل بمخرجين مصر كلهم، اللي اشتغلت معاهم بالذات، واي مسلسل أو فيلم باجي اشتغل فيه، بيقف في طريقي فيه، وبيتصل بالمخرج أو الإنتاج.

وأضافت: قسماً بالله العظيم وحياة الأيام المفترجة دي عمل كده عشرات المرات و منهم مرات قدامي أنا شخصياً، كنت بكون موجودة وبعمل بروفة لمسلسل ما و ألاقيه بيتصل بالكاست وأنا قاعدة معاهم وبسمع المكالمة كاملة، مش عايزني يبقي ليا ظهور ولا عايزني أكمل شغل، ده حتي لما جيت اشتغل شغلانة تانية وأعمل بيزنس خالص بيا وقفلي فيه، وحاول يخرجني منه ويدخل هو شريك بدالي، وماشي في كل حته يتباهي بشغله القديم وفاكر إن الناس هتخاف منه.

واستكملت: وللأسف فيه فعلا ناس كبرت دماغها مع ان هو ميقدرش يعمل حاجه وكله كلام على الفاضي، إنما بالفعل قعدت من شغل كتير أوي وفي عز الوقت اللي كنت فيه اقدر اشتغل، أنا فلت بمسلسل سلسال الدم ومسلسل حالة عشق و حاجات تانية بسيطة في خلال الـ١٣ سنة دول علشان مكانش عارف يشيلني منهم، وقسما بالله العظيم حاول، والتليفونات كانت بتبقي قدامي، بس معرفش، واتجنن أما اشتغلت في ٢٠١٦  وكان عايز يعمل فيا أي حاجة.

وأنهت حديثها قائلة: أنا على أد منا أكيد كارهة الشخص اللي واقف في رزقي و حاول يضايقني كده، على أد منا متضايقة أكتر من اللي ساعدوه، والشركات المصرية الكبيرة أوي، اللي فيها ناس صغيرين أوي سمعوا كلامه.

اقرأ أيضاً: راندا البحيري: التمثيل فيه شوية غدر واتجهت للبيزنس