سمية الخشاب عن إصابتها بسبب رامز جلال: «مهزلة ومتعمد الأذى»

تحدثت الفنانة سمية الخشاب عن تفاصيل إصابتها في برنامج المقالب الشهير «رامز جاب من الآخر»، مؤكدة على أنه تم عمل مونتاج للحلقة وإلغاء أجزاء كثيرة منها حتى لا تظهر إصابتها. 

وقالت سمية الخشاب، إنها استمرت في تصوير باقي مشاهد مسلسل بـ 100 راجل رغم تعرضها لتمزق في الأربطة بالقدم والكتف، حتى أنها قامت بإزالة الجبس لتتمكن من التصوير.

سمية الخشاب في برنامج رامز جاب من الآخر

 وتابعت: «اللي يزعل إن ولا حد منهم كجهة إنتاجية اتصل بالناس وقال سلامتكم أو أسف.. هو إحنا في غابة يا جماعة؟ مش مهم الناس يحصلها إيه المهم أطلع أنور وأعمل مشاهدات عالية؟ المهم مصلحتي والباقي يتحرق؟ إيه اللي بيحصل ده مهزلة لا يمكن السكوت عليها، الناس تتأذي في صحتها».

واستكملت سمية الخشاب قائلة: «ما أنا عملتها معاه 4 سنين قبل كدة بس كنت عارفة إيه اللي بيحصل لكن المرة دي متقالش، عشان في تعمد للأذية يبقى أنت كدة متعمد تأذي الناس، دي جريمة يعاقب عليها القانون زقالي إنه برنامج عادي فورمات.. وفي تعمد في الأذية والدليل إن مفيش حد اهتم إني اتصابت، ولما رحت للمستشفى قالولي أنت مش أول حالة، امبارح جالنا 3 حالات من عند رامز».

وأضافت: «أقل حد اتصاب حصله كدمات متعددة في جسمه.. معقول انتوا عارفين بتكسروا في الناس كل يوم ومكملين تصوير؟ وقال أصل الناس ماضية على إنهم موافقين على جميع الملابسات والظروف الخاصة بالبرنامج.. يعني ايه؟ أنا موافقة إنني اتكسر؟ أصلا مفيش عقد بيننا بس لو حتى فيه عقد، جسمنا ده مش ملكنا، ده ملك ربنا، فمش من حقك تؤذي جسمي صحيًا ونفسيًا وعصبيًا، فده ضد حقوق الإنسان وضد القانون.. قعدت 10 أيام عشان أقدر أنزل وشلت الجبس عشان أرجع التصوير وبدوس على رجلي لحد اللحظة دي إن رجلي ما زالت وارمة.. أنا رفعت قضية قضية فعلا ومن تاني يوم».

سمية الخشاب مسلسل بـ 100 راجل

 تحدثت عن مشاركتها بمسلسل بـ 100 راجل ضمن مسلسلات رمضان 2024، موضحة أن شخصية غالية مرهقة للغاية والعمل ككل متعب بسبب كثرة المشاهد المليئة بالحزن، وأرهقتها كثيرًا.

واستكملت سمية الخشاب قائلة: «شخصية غالية نموذج للسيدة المصرية التي تعمل سائقة ميكروباص وتخوض حروبًا كبيرة من أجل لقمة العيش والبقاء»، معربة عن سعادتها بجملة «رجعتي بقوة» التي تسمعها من الناس.

واختتمت: «أنا كسلانة ولا أبحث عن ورق مناسب أو أدوار أعمل بها وأحتاج لعلاج نفسي بعد مسلسل بـ 100 راجل وحزب أعداء النجاح وراء الهجوم عليّ وانتقادي».