محمود العسيلي: «لما خدت على قفايا عرفت إن دي رسالة من ربنا»
كتب: نسرين إبراهيم
كشف محمود العسيلي عن تفاصيل جديدة في حياته الشخصية، وبداية شهرته ودخوله مجال الفن، من خلال تصريحات تليفزيونية.
وقال محمود العسيلي: قدمت أول أغنية وأنا في تانية جامعة، وكانت أغنية مجنونة، والجمهور عرفني بعدها، ولما كنت بركب التاكسي وبعدي من قدام مدارس البنات يشوفوني يصرخوا ويجروا عليا، وبعدها حياتي اتغيرت، وبقيت أتعامل إني مشهور.
حسيت بالغرور بعد الشهرة
وأضاف: مع كل أغنية بعملها بعتبر كإنها أول عمل لسه بعمله، وفي وقت حسيت بالغرور وشوفت نفسي وقلت الله ده أنا جامد أوي روحت واخد على قفايا ودي كانت رسالة من ربنا إني أفوق لنفسي لإني معملتش لسه حاجة، واتعلمت إن عمري ما أبقى راضي عن مشروعي الفني أبدًا ولا أضمن النجاح ولا أعمل حاجة وأتوقع إنها تكسر الدنيا وإن كل حاجة بإيد ربنا.
وتابع: بعتبر نفسي لسه ببتدي، وهرضى بمشواري الفني لما أوصل للعالمية وأعمل حاجة مختلفة وأقف على مسرح عالمي بأوركسترا كامل.
مكنتش أتخيل إني هبقى مشهور
وقال: مكنتش أتخيل إني هبقى مشهور، وكنت حاطط قدامي هدف أشتغل في الإعلانات، والتمثيل كانت تجربة مش حلم، ولو اتعرض عليا عمل فني أمثل فيه معنديش مشكلة أشارك تاني، لأن شخصيتي اختلفت عن الأول.
اقرأ أيضا: بحضور تامر عاشور ومي فاروق وأحمد زاهر.. مدين يجمع نجوم الوسط الغنائي على الإفطار
