مجدي  الجلاد: الرئيس الراحل قالي حرفًا جمال ابني وهيفضل ابني وبيساعدني في الحزب

كشف الكاتب الصحفي مجدي الجلاد عن سر أخبره به الرئيس الأسبق حسني مبارك عن موضوع التوريث قائلًا: "انا ضد التوريث وده ثابت، عايز حد في مصر يقولي انه مكانش فيه شواهد واضحة، وهقولك سر ان الرئيس الراحل قالي حرفًا وهو في السلطة، جمال ابني وهيفضل ابني وبيساعدني في الحزب، مكشفتش عن ده ساعتها عشان الحوارات مع رئيس الجمهورية تكتب وترسل للرئاسة للمراجعة ويتم الإمضاء عليها ورقة ورقة وإعطاء الموافقة، والرئيس لما قالي الكلام ده قالي ده ليك انت بيني وبينك مش للنشر، وبالمنطق اللي كنت شايفه اه كان فيه خطة للتوريث".

وقال الكاتب الصحفي مجدي الجلاد، خلال استضافته ببرنامج "أسرار" مع الإعلامية أميرة بدر المذاع على قناة النهار: "مصطفى الفقي له واقعة شهيرة معايا وبيحكيها في كل حتة، كنت بعمل برنامج رمضاني وسألته سؤال، وهو كان قريب جدًا من السلطة، قلتله كيف تتعاملون مع جمال مبارك في الدولة، هل على أنه جمال مبارك أم أنه الرئيس الذي يحكم، وقلتله فكر دقيقة يا دكتور، قالي لا مش محتاج دقيقة، هويُعامل كرئيس جمهورية، وده موجود ومذاع على التليفزيون، وكان فيه شواهد، وجهه نظري في الموضوع وانا كنت جوه المطبخ ومازلت جوه المطبخ الاخبار بتجيلي لغاية عندي، و تقديري الشخصي، ان حسني مبارك لم يكن يريد لابنه ذلك، ولكن كانت هناك أطراف حوله شديدة القوة والنفوذ عايزة ده، وهم مؤثرين على مبارك، ربما حبيب العادلي وسوزان مبارك، ومجموعة الفكر الجديد بالحزب الوطني ايضًا، أما عمر سليمان كان ضد ذلك،".

كما كشف مجدي الجلاد عن سر بينه وبين المهندس أحمد عز قائلًا: "مبكتبش مذكرات أحمد عز، ولو عرض عليا هكتبها، والناس تعتقد أن الصحفي له مواقف سياسية ثابتة، وده غير صحيح، لكن المسألة حسب المرحلة الزمنية، يعني لو أحمد عز قالي اكتب مذكراتي أثناء فترة سلطته هرفض، لكن برا السلطة هو شخصية كانت مؤثرة في وقت ما في تاريخ مصر، مهنتي بتقول تأريخ ذلك لفائدة البلد وللأجيال اللي جاية". 

وأضاف: "دلوقتي مش في السلطة ولا يسعى لها، هو رجل أعمال وبينا نقاشات طويلة، وفي سر بيني وبينه قلت له ليه متكتبش مذكراتك، قالي لا مش هينفع وله اسبابه، وربما مش وقت الاسرار اللي هيعرضها، وانا لما جيت اكتب مذكراتي قفلتها في الفصل الثاني وقلت مش هكتب دلوقتى، ولكن هبقى سعيد اني اكتب عن فترة شديدة الأهمية مع شخصيات كانت تحكم مصر، لكنها الآن ليست في السلطة، واتمنى ان اكتب مذكرات".

اقرأ أيضاً: بعد غياب 5 سنوات.. مجدي الجلاد يعود ببرنامج على قناة SSC السعودية