مجدي الجلاد يكشف كواليس اختفائه إعلاميا خلال السنوات الماضية

كشف الكاتب الصحفي مجدي الجلاد عن موقف جمعه بالوزير الأسبق صفوت الشريف قائلًا: "في يوم السيد صفوت الشريف الله يرحمه كان أحيانا يقولي مبتعديش تشرب معايا قهوة ليه، مش أنا أبوك وأبو الصحفيين، فأعرف إن فيه حاجة، وابدأ أدور في المصايب اللي أنا عملتها، ونتفق أو نختلف هو كان سياسي عبقري". 

وتابع الجلاد: "في وسط الكلام، وقبل ما يطلب مني حاجة، قلتله عايز اسأل حضرتك سؤال، ليه بعض الأجهزة في مصر مش بتحبني، قالي اللي أنت قلته حقيقي، مش بيحبوك لكن بيحترموك، قلت له الاحترام عندي هو الأهم، قالي أنت بقيت مغرور، قلتله لا مش الحب ده في القلب والرسول صلى الله عليه وسلم قال لربنا القلب ده مش ملكي، وبالتالي مش هطلب المستحيل، لو مش بتحبوني لكن أقل حاجة الاحترام، وأنا بحترم الناس وعايزها تحترمني، والواقعة دي هو حكاها لصديق عزيز أكبر مني، قاله مجدي جاوبني إجابة غريبة جدًا وقالي مش عايز حب وعايز احترام، هل ده غرور، فصديقي رد عليه قاله، لأ طبعًا بس طبيعي مش هيجبر حد يحبه لكن هيحط حدود للتعامل".

وعن سبب اختفائه عن الساحة الإعلامية قائلًا: "سر الاختفاء ممكن يكون عشان الناس بتصدقني، مسألة الاختفاء سؤال دائم وفي ناس بتسألني في الشارع، والقصة إن في وقت ما كان اختفاء طواعية أو قسريًا، يبدو إن فيه اتفاق بين طرفين إن ده مش وقت مجدي أنه يتكلم، وربما يكون هناك تصالح بين الطرفين ان ده مش وقت مجدي، وأنا سعيد بده، احيانا الظروف اللحظية أو الزمنية في المرحلة الحالية تكون ميزتك هي اللي تمنعك، إن أراد الله إن مجدي قريب من الناس، وأغلب الناس مؤثر عندهم وسعيد لأني متصالح مع نفسي ومش هطلع الا اما اقول كلمتي".

واختتم حديثه قائلا: "وفيه شخص ذو نفوذ قوي جدًا في الدولة، وهو عايش لكن مش في منصبه، وحصل إن نتيجة لبعض آرائي المختلفة مع الدولة، قال بالحرف الواحد مجدي مش هيطلع في التليفزيون تاني، وبعدها قال إني هتحبس، ووصلي الكلام ده مع الأستاذ مكرم محمد أحمد اللي كان خايف عليا، وقتها دعيت على هذا الشخص، لأنه كان يحاربني في شغلي وبيتي وبنتي، قلت دعوة علمهالى أحد أهل الدين لما حكيت له، اللهم أرني في من ظلمني آية إن كان قد ظلمني، والدعوة اتحققت نصًا، وإني شفته بعدما أطيح به، وفرضت عليه إقامة جبرية، ولم أشمت، وبالصدفة، كأن ربنا ساقني لهذا المشوار عشان أشوفه، كنت عايز أقول إني أحد المظاليم مش المظلوم الوحيد، ومش ممكن أسامحه".

وجاء ذلك، خلال استضافته ببرنامج "أسرار" مع الإعلامية أميرة بدر المذاع على قناة النهار.

اقرأ أيضاً: بعد غياب 5 سنوات.. مجدي الجلاد يعود ببرنامج على قناة SSC السعودية