شهد سعيد: والدة جنة عليوة شتمتني ودعت عليا وقالت لي هحبسك

كشفت اللاعبة شهد سعيد، عن تفاصيل واقعة تعديها على زميلتها جنة عليوة، مؤكدة أنها لم تكن تقصد ما حدث ولكن اختل توازنها، وأنها حاولت التصالح معها ولكنها رفضت.

وقالت شهد، خلال تصريحات تليفزيونية: شعرت باختلال توازني خلال السباق ولم أكن أقصد ما حدث، اختل توازني فسندت عليها فهي وقعت ولكن والله ما كان قصدي أذى، ولما وقعت أنا كملت السباق بس رجعتلها تاني اطمن عليها لقيت الإسعاف خدتها، وأنا خدت عقوبة على ذلك.

وأضافت: هي بتقول إنها اشتكتني للحكم وده محصلش لأن أنا اللي اشتكيت أختها لأنها حاولت توقعني قبل كده، وخدت إنذار 4 مرات، وليه هأذيها عشان أكسب وأنا متأهلة للأولمبياد قبل اللي حصل ده.

وتابعت: لما رحت القسم مكانتش راضية تتصالح وقالت لي هحبسك وانتي مجرمة وزقتني، وأنا اتصدمت لأني كنت قايمة اعتذرلها وأبوس دماغها، ومامتها شتمتني ودعت عليا وقالت لي هحبسك وأنا والمدرب كنا مذهولين، هل دي الرياضة يعني أنا بنت عندي 19 سنة أروح قسم علشان بلعب رياضة.

وأكملت: قعدنا في القسم بعد الواقعة حوالي 7 ساعات وقعدت تحكي اللي حصل وأني زقتها، طيب أنتي ازاي يا حبيبتي عندك فقدان ذاكرة وارتجاج في المخ وبتحكي اللي حصل.